O Isus preobrazingjape

¹Hem vakjergja lenge: „Čače vakjerava tumenge – isi nesave maškar akala, koj tergjovena akate, koj nae te vkusinen o meribe, dži kote na dikhena e Devleskoro carstvo alo ki sila.“ ²Hem palo šov dive, o Isus lelja e Petare, e Jakove hem e Jovane hem ingargjalen samo olen ki jek uči planina, nasamo, hem preobrazingjapes anglo lende; ³hem oleskere šeja ule bleskava hem but parne, sar so o parnipa e phuvjakoro našti te parnarelen. ⁴Hem javingjape lenge o Ilija e Mojseja, hem kjerge lafi e Isuseja.

⁵A o Petar odgovoringja hem vakjergja Leske e Isuseske: „Ravi! Učitele, šukari tano te ova akate; te kjera trin šatojra: jek baši Tuke, jek baši o Mojsej hem jek baši o Ilija.“ ⁶Ustvari, na džanela sine so te vakjerel, soske sine but ki dar.

⁷Hem alo oblako hem učhargjalen, a taro oblako šungjapes glaso: „Akavaj tano Mlo manglo Čhavo! Šunen Ole!“ ⁸Hem taro jek puti koga dikhle naokolu, vekje nikas na dikhle uza peste, osven e Isuse.

⁹A koga hulena sine tari gora, zapovedingja lenge nikaske te na vakjeren so dikhle, dži kote o Manušikano Čhavo na voskresninela taro mule. ¹⁰Hem ola ikjerenale sine cvrsto odova lafi, ama maškar peste pučenape sine so značinela te voskresninelpes taro mule. ¹¹Hem pučlele: „Soske o knižnikja vakjerena deka prvo o Ilija trebela te avel?“

O farisea rodena znako

¹²A Ov vakjergja lenge: „O Ilija ka avel prvo, hem ka vospostavinel sa. A sar tano pišimo baši o Manušikano Čhavo: deka trebela but te cidel hem te ovel ponižimo? ¹³Ama, Me vakjerava tumenge, deka o Ilija alo, hem postapinge oleja, sar so mangle, sar soj tano pišimo baši leske.“

O Isus saskjarela e čhave opsednimo taro demoni

¹⁴Hem koga ale ko učenikja, dikhle but bari gužva okolu lende hem o knižnikja, koj prepirinenapes sine olencar. ¹⁵Hem štom celo gužva dikhlele, čudingepes, hem prastandile hem pozdravingele.

¹⁶Hem pučljalen: „Soske prepirinena tumen olencar?“

¹⁷A jek taro narodo odgovoringja Leske: „Učitele, angjum Tuke me čhave, ki kaste tano laloro duho, ¹⁸hem koga astarelale, frdelale tele, a ov mukela pena, krckinela dandencar hem zdrvinelapes. Vakjergjum lenge Tle učenikonge te paldenle, ama našti sine.“

¹⁹A Ov odgovoringja hem vakjergja: „O neverno rodo, dži koga ka ovav tumencar? Dži koga ka trpinav tumen? Anenle ki Mande!“

²⁰Hem angele Leske. A štom o duho dikhljale, odma tresingjale hem ov pelo ki phuv, valkajnelape sine hem mukela pena.

²¹Togaš pučljale e dade leskere: „Kobor vreme isi sar so ovela leske akava?“

A ov vakjergja: „Taro tiknipe, ²²a često frdelale ki jag hem ko pani – za da te mudarele. Ama, ako šaj nešto, smilujn Tut amenge hem pomožin amen!“

²³O Isus pak vakjergja leske: „Ako šaj nešto! Saj tano možno okoleske, koj verujnela!“

²⁴O dat e čhaveskoro odma vikingja hem vakjergja: „Verujnava! Pomožin baši mlo neverie!“

²⁵A o Isus štom dikhlja deka avela narodo, zakaningjapes e nečisto duhoske hem vakjergja leske: „Laloro hem kašuko duho, Me zapovedinava tuke, ikljov olestar hem poviše ma khuv ki leste.“

²⁶Hem vikingja hem tresingjale silno e čhave hem iklilo. Hem sine sar mulo, agjar so but džene vakjerena sine deka mulo. ²⁷A o Isus astargjale taro vas, vazdingjale hem uštilo.

²⁸A koga alo ko jek kher, Oleskere učenikja pučlele nasamo: „Soske amen našti sine te paldale?“

²⁹Hem odgovoringja lenge: „Akaja vrsta ništoja našti te paldelpes, osven molitvaja hem posteja.“

³⁰Hem koga gelo peske odothare, nakhle tari Galileja, hem na mangela sine nekoj te džanel baši odova; ³¹ustvari, sikavelalen sine Pe učenikon hem vakjerela sine: „O Manušikano Čhavo ka ovel predajmo e manušenge ko vasta, hem ka mudarenle; hem otkoga ka mudarenle, Ov ka voskresninel ko trito dive.“ ³²Ama ola na halilele odova lafi, a darana sine te pučenle.

³³Hem ale ko Kapernaum hem koga sine ko kher, pučljalen: „Baši so rasprajngen tumen drumaldan?“ ³⁴A ola kjutinena sine, soske drumaldan rasprajnenape sine maškar peste baši odova koj tano pobaro.

³⁵Ov pak bešlja, vikingja e Dešuduje Dženen hem vakjergja lenge: „Koj mangela te ovel prvo, neka ovel posledno hem sluga sarinenge!“

³⁶Togaš lelja jeke čhave, čhigjale maškar olende, gušingjale hem vakjergja lenge: ³⁷„Koj priminela jeke asavke čhave ko Mlo anav, Man priminelama, a koj priminelama Man, na priminelama Man, nego Okole Koj bičhagja Man.“

³⁸O Jovan vakjergja Leske: „Učitele, dikhlem jek – koj ko Tlo anav – paldela sine bilačhe duhia, a na džala palo amende, hem zabraningem leske, soske na džala palo amende.“

³⁹A o Isus vakjergja: „Ma braninenle! Soske nae nikoj, koj bi kjerela čudo ko Mlo anav hem te šaj odma palo odova te vakjerel bilačhipe baši Mange. ⁴⁰ Soske, koj nae tano protiv amende, ovi tano amencar. ⁴¹Hem koj ka del tumen čaša šudre pajneja ko Mlo anav, soske so sijen e Hristoskere, čače vakjerava tumenge, nae te našavel pli nagrada.

⁴²A koj soblazninela jeke taro akala tikne, koj verujnena ki Mande, pošukar ka ovel leske te obesinen ki men vodeničko bar hem te ovel frdimo ko more.

⁴³Hem ako tlo vas soblazninela tut, čhinle. Pošukar tano te khuve bizo vas ko životo, otkolku duje vastencar te dža ko pekol, ki jag so na ačhola, ⁴⁴kote ‘olengoro kirmo na merela, hem i jag na ačhola.’ ⁴⁵Ako tlo pro soblazninela tut, čhinle. Pošukari tano baši tuke te khuve ko životo sakati, otkolku duje prencar te ove frdimo ko pekol, ⁴⁶kote ‘olengoro kirmo na merela, hem i jag na ačhola.’ ⁴⁷Hem ako tli jak soblazninela tut, ikavla! Pošukari tano baši tuke te khuve e Devleske ko Carstvo jeke jajkhaja, otkolku te ove solduje jajkhencar frdimo ko pekol, ⁴⁸kote ‘olengoro kirmo na merela, hem i jag na ačhola.’

⁴⁹Soske sekoj ka ovel longjardo jagaja, hem sekoja žrtva ka longjarelpes londeja. ⁵⁰O lond tano šukar, ama ako o lond ovela bilondalo, soleja ka popravinenle? Neka ovel tumen lond ki tumende hem neka ovel tumen mir maškar tumende.“