O saskjariba e astarde manuše

¹Hem koga palo nekobor dive palem alo ko Kapernaum, šundilo deka tano ko kher. ²Hem khedingepes but džene, agjar so na sine vekje than anglo vudar; hem propovedinela sine lenge o Slovo.

³Hem ale ki Leste ingaribaja astardo, kas so ingarenale sine štar džene. ⁴Hem sar našti sine te anenle dži ki Leste, baši o narodo, phrage o krovi upro than kote so sine, hem kjerge dupka, hem mukle i postela ki koja pašljola sine o astardo.

⁵A o Isus, koga dikhlja olengiri vera, vakjergja e astardeske: „Mo čhavo, oprostinenapes tuke te grevia.“

⁶A nekoj taro knižnikja bešena sine odothe hem razmislinena sine ko pumare srcia: ⁷„So vakjerela akava agjare? Ov hulinela! Koj šaj te oprostinel grevia, osven jek Devel?“

⁸Hem o Isus odma štom doznajngja Ple duhoja deka ola razmislinena agjar ki peste, vakjergja lenge: „Soske razmislinena agjar ko tumare srcia? ⁹Soj tano polokho, te vakjerelpes e astardeske: ‘Oprostinenapes tuke te grevia,’ ili te vakjerelpes leske: ‘Ušti hem le ti postela, hem dža!’ ¹⁰Ama za da te džanen deka o Manušikano Čhavo isile vlast te oprostinel o grevia ki phuv“ - vakjergja e astardeske: ¹¹„Tuke vakjerava, ušti, vazde ti postela hem dža tuke khere!“

¹²Hem uštilo, odma vazdingja i postela, hem iklilo anglo leste, agjar so sarine čudisalile hem slavingele e Devle, vakjeribaja: „Asavko nešto panda nikogaš na dikhlem!“

O Isus vikinela e Levija

¹³Hem iklilo palem uzo more; hem celo narodo avela sine ki Leste, hem poučinela sine len.

¹⁴Hem nakhindor, dikhljale e Levija e Alfejeskoro, sar bešela ki carina, hem vakjergja leske: „Ava pali Mande!“ Hem ov uštilo hem gelo pali Leste.

¹⁵Hem koga pružingjape uzi trpeza ko oleskoro kher, but carinikja hem grešnikja sine uzi trpeza, e Isuseja hem Oleskere učenikoncar, soske isine but gužva, hem džana sine pali Leste. ¹⁶A koga o knižnikja hem o farisea dikhlele sar hala e grešnikoncar hem e carinikoncar, vakjerge lenge Oleskere učenikonge: „Soske hala hem pijela zaedno e carinikoncar hem e grešnikoncar?“

¹⁷A o Isus, koga šungja odova, vakjergja lenge: „Na trebela lenge doktori e sastenge, nego e nasvalenge. Na aljum te vikinav e pravednon, nego e grešnikon ko pokajanie.“

¹⁸E Jovaneskere učenikja hem o farisea postinena sine. Hem ale hem vakjerge Leske: „Soske e Jovaneskere učenikja hem o učenikja e farisengere postinena, a Tle učenikja na postinena?“

¹⁹O Isus vakjergja lenge: „Šaj li o henamika te postinen dži kote tano o džamutro olencar? Dži kote isilen peja e džamutre, našti te postinen. ²⁰Ama, ka aven dive koga ka lelpe e džamutre olendar: hem togaš – ko odova dive – ka postinen.

²¹Nikoj na sivela krpa taro nevo šej upro purane šeja. Inaku, o sivdo čhingjola olestar o nevo taro purano, hem o pharavdo ka ovel pološno.

²²Hem nikoj na čhivela nevi mol ko purane kože moljakere; inaku i nevi mol ka čhinel o kože e moljakere, pa ka propadinen hem i mol hem o kože moljakere. Nego, nevi mol – ko neve kože moljakere!“

O Isus tano Gospodari e sabotakoro

²³A koga ki sabota džala sine tari niva, Oleskere učenikja počminge te kjeren drumo, čhinibaja klasje. ²⁴Hem o farisea vakjerge Leske: „Dik! Soske kjerena ki sabota odova so nae tano dozvolimo?“

²⁵Vakjergja lenge: „Zarem nikogaš na čitingen, so kjergja o David koga sine ki nevolja hem koga bokhalilo ov hem okola, so sine oleja? ²⁶Sar khugja e Devleske ko kher, ko vreme e prvosveštenikoske o Avijatar, hem halja o postajme mare, koj nikoj na smejnela te hanlen osven o sveštenikja; hem dengja okolenge, koj sine oleja!“

²⁷Hem vakjergja lenge: „I sabota tani kjerdi baši o manuš, a na o manuš baši sabota. ²⁸Agjar, o Manušikano Čhavo tano Gospodari e sabotakoro.“