¹Hem khugja palem ki sinagoga, a odothe sine manuš šuke vasteja. ²Hem dikhenajne, dali ka saskjarele ki sabota, za da te kjerenle krivo.

³Hem vakjergja e manušeske, kas sinele šuko vas: „Tergjov maškar!“ ⁴Hem vakjergja lenge: „Dali tano dozvolimo ki sabota: te kjerelpes šukaripa ili bilačhipa? Te spasinelpes duša, ili te mudargjovel?“ A ola kjutinena sine.

⁵Togaš dikhljalen, naokolu, holjaja, hem tužno baši olengere srcia soj zakoravime, vakjergja leske e manušeske: „Pružin to vas!“ Hem ov pružingja hem ulo palem sasto oleskoro vas.

⁶A o farisea, koga iklile, odma kjergepes lafi e irodovcencar protiv Leste, za da te uništinenle.

O Isus izbiringja e Dešuduje Dženen

⁷A o Isus povlečingjapes Pe učenikoncar ko more, hem bari gužva tari Galileja, cidinge pali Leste, hem tari Judeja, ⁸hem taro Erusalim, tari Idumeja hem tari javer strana e Jordaneskiri, tari okolina Tir hem Sidon, bari gužva ali ki Leste, otkoga šunge so kjerela sine.

⁹Hem vakjergja lenge Pe učenikonge te spreminen Oleske jek brodi baši o narodo, za da ma te steginenle. ¹⁰Soske bute dženen lečingja, agjar so navalinena ki Leste sarine, koj cidena sine, za da te doprinenle. ¹¹Hem o nečista duhia štom ka dikhenle, perena sine angli Leste hem vikinena sine, vakjeribaja: „Tu sijan e Devleskoro Čhavo!“ ¹²Hem zabraninela sine lenge strogo te na šujnakjerenle.

¹³Hem uklilo ki gora hem vikingja ki Peste okolen, kas so manglja, hem ola gele ki Leste. ¹⁴Hem opredelingja Dešuduje Dženen te oven Oleja, hem te bičhavelen te propovedinen, ¹⁵hem te ovelen vlast te palden demojna.

¹⁶Hem opredelingjalen Dešuduje Dženen: hem e Simoneske dengjale o anav Petar, ¹⁷pa o Jakov e Zavedeskoro hem o Jovan, o phral e Jakoveskoro, kaske so dengja anav Voanerges – so značinela: Čhave e Gromeskere; ¹⁸hem o Andrej, hem o Filip, hem o Vartolomej, hem o Matej, hem o Toma, hem o Jakov e Alfejeskoro, hem o Tadej, hem o Simon Hananec, ¹⁹hem o Juda Iskariotski, koj predajngjale.

I hula protiv o Sveti Duh

²⁰Hem alo ko jek kher, hem palem khedingjapes narodo, agjar so našti sine ni maro te han. ²¹A koga Oleskere šunge baši odova, iklile za da te priberinenle, soske vakjerena sine deka nae tano upri Peste.

²²O knižnikja palem, koj ale taro Erusalim, vakjerena sine deka isile o Velzevul hem deka so pomoš e demonsko knezoja paldela e demonen.

²³Hem otkoga povikingjalen, vakjerela sine lenge ko parabole: „Sar šaj o satana te paldel satana? ²⁴Ako jek carstvo ulavelapes protiv peste, odova našti te ikjerelpes. ²⁵Hem ako kher ulavelapes protiv peste, odova kher našti te opstaninel. ²⁶Hem ako o satana uštilo protiv peste hem ulavelapes, na kašti te opstaninel, nego alo leskoro krajo. ²⁷Ama nikoj našti te khuvel ko kher e silnoske hem te čorel andral o kher, ako prvo na phandela e silno hem togaš te čorel oleskoro kher.

²⁸Čače vakjerava tumenge, deka e manušikane čhavenge ka oven olenge oprostime sa o grevia hem hule, kobor hem te hulinen; ²⁹ama koj ka pohulinel ko Sveti Duh, nae proška dovek, nego obvininelale večno grevo,“ ³⁰soske vakjerge: „Isile nečisto duho!“

I čačutni familija e Isuseskiri

³¹Hem togaš ale Oleskiri daj hem Oleskere phrajlja hem, terdindor avrijal, bičhage ki Leste te povikinenle. ³²A okolu Leste bešena sine narodo hem vakjerge Leske: „Ekje Ti daj hem Te phrajlja avrijal rodena Tut!“

³³Hem ko odgovor vakjergja lenge: „Koj tane Mi daj hem Me phrajlja?“ ³⁴Hem dikhljalen naokolu odolen, koj bešena sine okolu Leste hem vakjergja: „Ekje tane Mi daj hem Me phrajlja! ³⁵Soske, koj ispolninela e Devleskiri vojlja, ovi tano Mo phral, hem phen, hem daj.“