I čačikani čistota

¹Hem khedingepes okolu Leste o farisea hem nekoj taro knižnikja, koj sine ale taro Erusalim, ²hem dikhle deka nekoj taro oleskere učenikja hana maro melale, ustvari bithovde vastencar.

³Soske o farisea hem sa o Judejcia – ikjeribaja dži ko običaja e phurengere – na hana, ako na thovena pe vasta dži ko laktia; ⁴hem koga ka iranenpes taro pazari, na hana, ako na thovenapes. Hem isi panda but javer, so priminge te održinenle: thojbe o čaše, o bukali, bakarna čare hem stolice.

⁵Hem agjar, o farisea hem o knižnikja pučlele: „Soske Tle učenikja na živinena spored o običaja e phurengere, nego hana maro bithovde vastencar?“

⁶A Ov vakjergja lenge: „Šukar prorokujngja o Isaija baši tumenge licemejra, sar soj tano pišimo:

‘Akava narodo poštojnela Man mujeja,
a olengoro srce tano dur Mandar;
⁷ko čučo poštojnena Man,
sikajbaja nauke, soj tane manušikane zapovedia.’

⁸Tumen mukena e Devleskiri zapoved, a ikjerena manušikano običaj.

⁹Tumen šukar čhinavenala“ – prodolžingja Ov – „e Devleskiri zapoved, za da te ikjeren tumaro običaj! ¹⁰Ustvari, o Mojsej vakjergja: ‘Poštojn te dade hem te daja’ hem ‘Koj ka dele armajna pe dade hem pe daja, te ovel kaznimo meribaja!’ ¹¹A tumen vakjerena: ‘Ako nekoj vakjerela pe dadeske ili pe dajake: „Odova koleja bi šaj te izdržinav tut tano kurbani,“’ ustvari bakšiši e Devleske, ¹²na mukenale vekje te kjerel so hem bilo baši plo dat hem baši pli daj. ¹³Hem agjar čhinavena e Devleskoro slovo tumare običajeja, so tumen predajngenle, hem kjerena but javera bukja slična ko akava.“

¹⁴Togaš palem vikingja e narodo ki Peste hem vakjergja lenge: „Šunen Man sarine hem hajljoven! ¹⁵Nae ništo, avrijaldan taro manuš, so bi šaj te kjerele nečisto koga ka khuvel ki leste; nego okova so ikljola taro manuš, odova kjerelale nečisto. ¹⁶Kas isi kana, neka šunel!“

¹⁷Odma, koga cidingjape podur taro narodo, Ov khugja ko jek kher, Oleskere učenikja pučlele baši smisla e parabolakiri.

¹⁸Ov vakjergja lenge: „Agjar! Zarem hem tumenda na hajljovena? Na svatinena li deka ništo našti te kjerele e manuše nečisto, so khuvela avrijaldan ki leste, ¹⁹soske na khuvela ko oleskoro srce, nego ko vogi hem džala ko odredimo than?“ Agjar proglasingja sa o hajba baši čista.

²⁰Isto agjar vakjerela sine lenge: „Okova so ikljola e manušestar, odova kjerelale nečisto, ²¹soske, andraldan, taro e manušeskoro srce, ikljovena grešna misle, koj vodinena ko nemoral, čoriba, mudariba, ²²preljuba, alčnost, bilačhipa, hovajba, zavist, navrede, gordelivost, hem bigogjakere bukja. ²³Sa odola bilačhipa ikljovena andraldan hem kjerenale nečisto e manuše.“

O Isus iscelinela e čhaja astardi taro nečisto duho

²⁴Uštilo odothare hem gelo ko Tirsko hem Sidonsko Krajo. Khugja ko jek kher hem manglja sine nikoj te na doznajnele. A našti sine te ačhovel garavdo. ²⁵Koga šungja baši Leske jek romni, kaskiri čhaj sine astardi taro nečisto duho, oj ali hem peli anglo Oleskere pre. ²⁶A odoja romni sine Elinka, rodum Sirofeničanka. Hem molinelale sine te paldel e demone tari lakiri čhaj.

²⁷A Ov vakjergja lake: „Muk prvo te čajljoven o čhave, soske nae tano šukar te lelpes lendar o maro e čhavendar hem te frdelpes e džukjelenge.“

²⁸Oj palem odgovoringja: „Oja, Gospodar! Ama hem o džukjela teli sofra hana taro troške e čhavendar.“

²⁹Hem vakjergja lake: „Baši odova lafi – dža tuke – o demoni iklilo tari ti čhaj.“ ³⁰Hem irangjapes khere hem arakhlja e maksme sar pašljola ki postela, a o demoni iklilo.

O Isus saskjarela e lalore kašuke

³¹Hem koga iklilo palem taro predejlja e Tireskere, alo – preku Sidon – dži ko Galilejsko More, maškar o predejlja taro Desettogradie. ³²Hem ange Leske kašuko laloro hem molinenale sine te čhivel Po vas ki leste.

³³Hem ingargjale nasamo taro narodo, čhigja Ple naja ko oleskere kana, hem čhungargja hem dopringja oleskiri čhip; ³⁴dikhlja ko nebo, vozdivningja hem vakjergja leske: „Efata!“ – ustvari: „Phrav tut!“ ³⁵Hem odma phravdile o kana leskere hem phravdili i vrska oleskere čhibjatar hem kjerela sine lafi čisto.

³⁶Hem zapovedingja lenge nikaske te na vakjeren. Ama kobor poviše naredinela lenge Ov, doborom poviše ola šujnakjerena sine. ³⁷Hem previše čudinenapes sine hem vakjerena: „Sa šukar kjerela! Hem e kašuken kjerela te šunen, hem e laloren te kjeren lafi!“