O Isus paravela štar iljade manušen

¹Ko odola dive, koga palem khedingepes bari gužva hem na sinelen so te han, vikingja Ple učenikon hem vakjergja lenge: ²„Žal mange tano baši o narodo, soske vekje trin dive tane postojano uzo Mande hem nae so te han. ³Ako mukavalen bokhale ko olengere khera, ka omalaksinen ko drumo, soske nekoj olendar ale tane duraldan.“

⁴Hem Oleskere učenikja odgovoringe Leske: „Kotar šaj nekoj te čajljarelen marencar akate ki pustina?“

⁵Hem pučljalen: „Kobor mare isi tumen?“

A ola vakjerge: „Evta.“

⁶Togaš zapovedingja e narodoske te pružinenpes ki phuv. Hem lelja o evta mare, zablagodaringja hem phagljalen hem delalen sine Ple učenikonge te čhivenlen, hem ola čhigelen anglo narodo. ⁷Sinelen hem hari mačhe. Hem koga blagoslovingjalen, zapovedingja te čhivenlen hem olen.

⁸Hem hale hem čhalile, hem vazdinge evta korpe so ačhile kotora. ⁹A sine okolu štar iljade; hem mukljalen.

¹⁰Hem odma khugja ko brodi Ple učenikoncar, hem alo ki okolina Dalmanuta.

O farisea rodena znako

¹¹Hem o farisea iklile hem počminge te prepirinenpes Oleja, rodibaja Olestar znako taro nebo, te iskušinenle. ¹²A Ov vozdivningja Ple duhoja hem vakjergja: „Soske akava pokolenie rodela znako? Čače vakjerava tumenge, nae te delpes leske znako akale rodoske.“ ¹³Hem mukljalen palem, khugja ko brodi hem nakhlja tari javer strana.

¹⁴Hem bisterge te len maro, a sinelen samo jek maro peja ko brodi. ¹⁵Hem zapovedingja lenge, vakjeribaja: „Dikhen! Arakhen tumen taro farisejsko kvasac hem taro kvasac Irodeskoro.“

¹⁶Ola palem razmislinena sine maškar peste: „Vakjerela amenge soske nane amen maro!“

¹⁷A o Isus koga halilo odova, vakjergja lenge: „Soske mislinena deka nae tumen maro? Panda li na hajljovena hem na svatinena? Baralo li tano tumaro srce? ¹⁸Jajkha isi tumen, a na dikhena? Kana isi tumen, a na šunena? ¹⁹Hem na spomninena li tumenge, koga phagljum o pandž mare ko pandž iljade, kobor korpe pherde zalagoncar vazdingen?“

Vakjerge Leske: „Dešuduj.“

²⁰„Koga phagljum evta mare ko štar iljade, kobor korpe pherde zalagoncar vazdingen?“

Vakjerge: „Evta.“

²¹Hem vakjergja lenge: „Panda li na hajljovena?“

O Isus saskjarela e korole ki Vitsaida

²²Hem ale ki Vitsaida. Hem ange Leske jek korolo hem molinenale sine te doprinele. ²³Ov astargja e korole taro vas, ikagjale avri taro gav hem čhungargja ko jajkha leske; čhigja Ple vasta ki leste hem pučljale: „Dikheja li nešto?“

²⁴Vazdingja pe jajkha hem vakjergja: „Dikhava manuša sar džana, dikhavalen sar kašta.“

²⁵Palo odova palem čhigja Ple vasta ko oleskere jajkha, hem dikhlja hem sastilo, hem dikhela sine sa jasno. ²⁶Hem bičhagjale ko oleskoro kher, vakjeribaja: „Ma khuv ko gav, hem nikaske ma vakjer!“

O Isus vakjerela Plo meriba hem o voskresenie

²⁷Hem iklilo o Isus, Ple učenikoncar, ko gava ki Kesarija Filipova; a drumaldan pučelalen sine Ple učenikon, vakjeribaja lenge: „So vakjerena o manuša, Koj Sijum Me?“

²⁸Ola vakjerge Leske: „O Jovan Krstitel, javera vakjerena o Ilija; a treta – deka sijan jek taro prorokja.“

²⁹Ama Ov pučljalen: „A tumen baši Kaste računinena Man?“

O Petar ko odgovor vakjergja Leske: „Tu sijan o Hristos*.“

³⁰Hem zabraningja lenge nikaske te na vakjeren baši Leske.

³¹Hem počmingja te učinelen deka o Manušikano Čhavo trebela te cidel but hem te ovel otfrlimo taro starešine, o prvosveštenikja hem o knižnikja; deka ka mudarenle hem deka palo trin dive ka voskresninel. ³²Hem odova kjerela sine lafi otvoreno. A o Petar leljale nasamo hem počmingja te ukorinele.

³³Ama Ov irangjapes dikhlja Ple učenikon, ukoringja e Petre hem vakjergja: „Dža tuke Mandar, satano, soske tu na mislineja baši okova soj tano Devleskoro, nego baši okova soj tano manušikano.“

³⁴Hem povikujngja e narodon, zaedno Ple učenikoncar hem vakjergja lenge: „Koj mangela te avel pali Mande, neka odrečinelpes pestar hem neka vazdel plo krsto hem neka džal pali Mande. ³⁵Soske, koj mangela te spasinel pli duša, ka našavela; a koj ka našavel pli duša baši Mange hem o Evangelie, ka spasinela.

³⁶Soske, soj korisno tano e manušeske, ako dobinela celo sveto, a pli duša našavelala! ³⁷Soske, so šaj o manuš te del ki zamena baši pli duša? ³⁸Soske, koj ladžala Mandar hem taro Mle lafia ko akava grešno rodo koj kjerela preljuba, hem o Manušikano Čhavo ka ladžal olestar, koga ka avel ki slava Ple Dadeskiri, e sveto angelencar.“

*Stiho 29: O Hristos ko grčki značinela Mesija, ili Pomazaniko.