O dešuduj učenikja

¹Hem vikingja Ple dešuduje učenikon ki Peste, hem dengjalen vlast upro nečista duhia te paldenlen hem te saskjaren sekova nasvalipa hem sekoja slabost.

²A akalaj tale o anava e dešuduje apostolengere: prvo o Simon, vakjerdo Petar, hem oleskoro phral o Andrej, pa o Jakov e Zavedeskoro hem o phral leskoro o Jovan, ³o Filip hem o Vartolomej, o Toma hem o Matej o cariniko, o Jakov e Alfejeskoro hem o Tadej, ⁴o Simon Kananit hem o Juda Iskariotski, koj hem predajngjale.

⁵O Isus bičhagjalen adale dešuduje dženen hem naredingja lenge, vakjeribaja: „Ma džan palo drumo ko narodia, hem ma khuven ki diz e Samarjanenge; ⁶nego džan pošukar ko našavde bakhre e Izraeleske ko kher. ⁷Hem džandor, propovedinen hem vakjeren deka avela paše o carstvo nebesno. ⁸Saskjaren e nasvalen, voskresninen e mulen, očistinen e leproznen, palden e demonen; bizo pare dobingen, bizo pare den.

⁹Ma len ni zlato, ni srebro, nitu ba-kri ko tumare pojasia; ¹⁰nitu torba baši drumo, ni duj šeja, ni kundre, ni kaš, soske o rabotniko zaslužinela plo hajbe.

¹¹A koga khuvena ki savo hem bilo diz ili gav, raspučen koj tano dostojno ki leste; hem ačhoven odothe dži kote na džana tumenge olestar. ¹²A koga ka khuven ko kher, pozdravinenle. ¹³Hem ako čače o kher ovela dostojno, tumaro mir neka avel ki leste; a ako na ovela dostojno, tumaro mir neka iranelpes tumenge. ¹⁴Hem ako nekoj na priminela tumen, nitu šunela tumare lafia, koga ikljona taro odova kher ili diz tresinen o pravo taro tumare pre. ¹⁵Čače vakjerava tumenge, polokho ka ovel e Sodomsko hem i Gomorsko phuv ko sudno dive, otkolku odole dizake.

¹⁶Ekje Me bičhavava tumen sar bakhre maškar o ruva; odoleske oven mudra sar sapa hem bezopasna sar gulubia. ¹⁷Arakhen tumen taro manuša, soske ka predajnen tumen e sudonge hem ka kamšikujnen tumen ko pumare sinagoge. ¹⁸Ka ikalen tumen anglo upravitejlja hem o cajra, baši Mange, baši svedoštvo olenge hem e narodonge. ¹⁹A koga ka predajnen tumen, ma sekirinen tumen sar ili so ka vakjeren, soske ko odova saati ka ovel tumenge tano dendo so trebela te vakjeren; ²⁰soske na sijen tumen koj kjerena lafi, nego o Duho tumare Dadeskoro, Koj kjerela lafi ki tumende.

²¹A o phral ka predajnel pe phrale ko meribe, hem o dat – e čhave, hem o čhave ka oven protiv o roditejlja hem ka mudarenlen. ²²Hem ka oven mrzime taro sarine baši Mlo anav; ama, koj ka pretrpinel dži ko krajo, ov ka ovel spasimo.

²³Koga ka goninen tumen ki diz, našen ki javer; soske čače vakjerava tumenge, nae te obikolinen o izraelska diza dži kote avela o Čhavo Manušikano.

²⁴O učeniko nae tano upreder o učiteli, nitu o sluga upreder plo gospodari. ²⁵Dosta leske tano e učenikoske te ovel sar leskoro učiteli hem e slugaske sar leskoro gospodari. Ako o gazda e khereskoro vakjerenale Velzevul, kobor poviše oleskere kherutne!

²⁶Odoleske, ma daran olendar; soske nae ništo učhardo, so nae te otkrinelpes, nitu garavdo so nae te doznajnelpes. ²⁷So vakjerava tumenge ko karanluko, vakjerenle ki svetlina; hem so ka šunen ko kan, proglasinenle taro krovia.

²⁸Hem ma daran taro okola koj mudarena o telo, a i duša našti te mudarenla. Nego daran poviše taro Okova, Koj šaj te uništinel hem i duša hem o telo ko pekol.

²⁹Na bikinenapes li duj čhiriklja baši jek para? Pa nijek taro olendar na perela ki phuv bizo vojlja tumare Dadeskiri. ³⁰A tumenge tane gejnde duri hem o bala ko šero. ³¹Hem agjar, ma daran. Tumen sijen poskupa taro but čhiriklja.

³²Hem agjar, sekoj koj priznajnelama Man anglo manuša, ka priznajnavle hem Me le anglo Mlo Dat, Koj tano ki nebesa. ³³A koj ka odrečinelpes Mandar anglo manuša, hem Meda ka odrečinapes olestar anglo Mlo Dat, Koj tano ki nebesa.

³⁴Ma mislinen deka aljum te anav mir ki phuv. Na aljum te anav mir, ama mači. ³⁵Soske aljum ‘te razdelinav e manuše taro oleskoro dat hem e čhaja tari lakiri daj, hem e bojra tari lakiri sasuj,’ ³⁶hem ‘dušmani e manušeske ka oven oleskere kherutne.’

³⁷Koj mangela e dade ili e daja, poviše Mandar, nae tano dostojno baši Mange, hem koj mangela e čhave ili e čhaja, poviše Mandar, nae tano dostojno baši Mange; ³⁸hem koj na lela plo krsto hem na džala pali Mande, nae tano dostojno baši Mange. ³⁹Koj ka arakhel pli duša, ka našavela; hem koj ka našavela pli duša baši Mange, ka arakhela.

⁴⁰Koj priminela tumen, priminelama Man, a koj priminelama Man, priminela Okole, Koj bičhagja Man. ⁴¹Koj priminela proroko ko anav e prorokoske, ka priminel proročko nagrada; hem koj priminela pravedniko ko anav e pravednikoskoro, ka priminel pravedničko nagrada. ⁴²Koj ka pherel jek taro akala tikne samo čaša šudre pajneja, soske tano učeniko, čače vakjerava tumenge, nisar nae te našavel pli nagrada.“