O Isus saskjarela astardo ki postela

¹Hem otkoga khugja ko brodi, prenakhlja hem alo ki Pli diz. ²Hem ekje, ange Leske astardo, koj pašljola sine ki postela. A koga o Isus dikhlja olengiri vera vakjergja e astardeske: „Ohrabrin tut, mo čhavo. Oprostinenapes tuke tle grevia.“

³Hem ekje, nekoj taro knižnikja vakjerge ki peste: „Akava grešinela anglo Devel.“

⁴A o Isus, džandipaja olengere misle, vakjergja: „Soske mislinena bilačhipa ko tumare srcia? ⁵Pa soj tano polokho te vakjerelpes: ‘Oprostinenapes tuke tle grevia,’ ili te vakjerelpes: ‘Ušti hem dža’? ⁶Ama, za da te džanen deka o Čhavo Manušikano isile vlast ki phuv te oprostinel grevia,“ togaš vakjergja e astardeske: „Ušti, vazde tli postela hem dža tuke khere.“ ⁷Hem uštilo hem gelo peske khere.

⁸A o narodo, koga dikhlja odova, darandile hem proslavinge e Devle, Koj dengjalen asavki vlast e manušenge.

O Isus vikinela e Mateje

⁹A koga o Isus džala peske sine odothare dikhlja jeke manuše, ko anav Matej, sar bešela ki tezga baši khediba danoko, hem vakjergja oleske: „Phir pali Mande!“ Ov uštilo hem gelo pali Leste.

¹⁰Hem ulo, otkoga bešla Ov ki sofra ko kher, ekje, but carinikja hem grešnikja ale hem bešle e Isuseja, hem Oleskere učenikoncar. ¹¹Štom o farisea dikhle odova, vakjerge Oleskere učenikonge: „Soske tumaro Učiteli hala e carinikoncar hem e grešnikoncar?“

¹²A Ov, koga šungja odova, vakjergja: „E sastenge na trebela doktori, nego e nasvalenge! ¹³Ama džan hem sikljoven so značinela: ‘Milost mangava, a na žrtve’; soske na aljum te vikinav e pravednikon, nego e grešnikon ko pokajanie.“

¹⁴Togaš e Jovaneskere učenikja ale ki Leste hem vakjerge: „Soske amen hem o farisea postinaja but, a Tle učenikja na postinena?“

¹⁵A o Isus vakjergja lenge: „Šaj li o henamika te žalinen, dži kote tano o džamutro olencar? Ama, ka aven dive koga ka lelpes lendar e džamutre; hem togaš ka postinen.

¹⁶Nikoj na čhivela kotor taro nevo materiali ko purane šeja, soske o kotor ka khedelpes hem ka kjerel panda pobari dupka. ¹⁷Nitu nevi mol čhivelapes ko purane kože baši mol; inaku o kože baši moljake čhingjona, i mol thavdela hem o kože moljakere propadinena. Nego nevi mol čhivelape ko neve kože moljakere pa pazinenapes hem o solduj zaedno.“

O Isus vazdela taro mule e čhaja hem saskjarela e romnja so sine nasvali

¹⁸Dži kote vakjerela sine lenge baši odova, ekje jek načalniko ki sinagoga alo, pelo anglo Leste ničkum hem vakjergja: „Mli čhaj muli akana; nego ava hem čhiv Tlo vas ki late, hem oj ka živinel.“

¹⁹Hem o Isus uštilo hem sledingjale, Ple učenikoncar. ²⁰Hem ekje, romni, koja bolujnela sine dešuduj berš taro krvarenje ali Leske paše palaldan hem dopringjapes dži ko kraja taro Oleskere šeja. ²¹Soske vakjerelajne ki peste: „Samo ako doprinava man dži ko Oleskere šeja, ka saskjovav.“

²²A o Isus irangjapes, dikhljala hem vakjergja lake: „Ohrabrin tut, mi čhaj. Tli vera saskjargja tut.“ Hem i romni sine sastili taro odova saati.

²³Hem koga o Isus alo ko kher e načalnikoske, dikhlja okolen so bašalena hem e narodon sar vikinena, ²⁴hem vakjergja: „Našen ko krajo, soske i čhaj nae tani muli, nego sovela.“ Hem ola asandile Leske. ²⁵Otkoga ikalgja e narodon, khugja hem astargjala taro vas, hem i čhaj uštili. ²⁶Hem o glaso baši odova šundilo ki celo odoja phuv.

O Isus saskjarela e duje kororen

²⁷Hem koga o Isus džala peske sine odothare, duj korore sledinenale sine, vikibaja hem vakjeribaja: „Smilujn Tut amenge, Čhavo e Davideskoro!“

²⁸A koga alo ko kher, o korore ale ki Leste, a o Isus vakjergja lenge: „Verujnena li deka šaj te kjerav odova?“

Vakjerge Leske: „Oja, Gospodar!“

²⁹Togaš dopringja olengere jajkha, vakjeribaja: „Neka ovel tumenge sprema tumari vera.“

³⁰Hem o jajkha phravdile olengere. Hem o Isus zapovedingja olenge strogo: „Dikhen, nikoj te na džanel baši odova!“ ³¹A ola, štom iklile, šujnakjerge ki celo odoja phuv.

O Isus saskjarela lalore manuše opsednimo taro demoni

³²Dži kote ola ikljovena sine, ekje, ange Leske manuš laloro hem astardo taro demoni. ³³Otkoga o demoni sine paldimo, o laloro kjergja lafi. Hem o narodo čudingepes, vakjerena sine: „Nikogaš na dikhlilopes asavko nešto ko Izrael!“

³⁴A o farisea vakjerena sine: „Ov paldela e demonen preku o vladeteli e demonengoro.“

³⁵Hem o Isus obikolinela sine sa o diza hem gava, sikajbaja ko olengere sinagoge hem propovedibaja o Evangelie e carstvoskoro hem saskjaribaja sekova nasvalipa hem sekoja slabost maškar o manuša. ³⁶A koga dikhlja e narodon, pelo Leske žal baši olenge, soske sine čhindile hem rasprskime sar bakhre, koj naelen pastiri.

³⁷Togaš vakjergja lenge Ple učenikonge: “I žetva čače tani bari, a rabotnikja hari, ³⁸molinenle togaš e Gospodare e žetvakoro te bičhalel rabotnikja ki Pli žetva!“