O farisejsko hem sadukejsko kvasac

¹Hem o farisea hem o sadukea ale, hem te iskušinenle, rodinge te sikavel lenge znako taro nebo.

²Ama Ov odgovoringja hem vakjergja lenge: „Koga avela akšami, vakjerena: ‘Ka ovel šužo vreme, soske o nebo tano lolo;’ ³a sabaleskoro: ‘Avdije ka ovel bura, soske o nebo tano lolo hem kalilo.’ Licemerna, džanena čače te pendžarenle o muj taro nebo, a o znakja e vremengere našti! ⁴Lukavo hem preljubotvorno pokolenie rodela znako, hem nae te ovel leske dendo znako, osven o znako e Jonaskoro o proroko.“ Hem mukljalen hem gelo peske.

⁵Hem Oleskere učenikja nakhle tari javer strana hem bisterge te len maro. ⁶O Isus vakjergja lenge: „Pazinen hem arakhen tumen taro farisejsko hem sadukejsko kvasac!“

⁷Hem ola kjerge lafi maškar pumende, vakjeribaja: „Odovaj tano so na lelem maro.“

⁸A O Isus džanlja odova, vakjergja lenge: „Tikne verakere, soske kjerena lafi maškar tumende, deka na lelen maro? ⁹Panda li na hajljovena hem na pamtinena baši o pandž mare ko pandž iljade hem kobor korpe vazdingen? ¹⁰Ni baši o evta mare ko štar iljade hem kobor korpe vazdingen? ¹¹Sar na hajljona, deka na baši o maro vakjergjum tumenge te arakhen tumen taro farisejsko hem sadukejsko kvasac?“

¹²Togaš halile deka na vakjergja lenge te arakhenpes taro e mareskoro kvasac nego taro učenje farisejsko hem sadukejsko.

O ispoved e Petareskoro

¹³A koga o Isus alo ki okolina ki Kesarija Filipova, pučlja Pe učenikon hem vakjergja: „So vakjerena o manuša, Koj tano o Čhavo Manušikano?“

¹⁴A ola vakjerge: „Jek vakjerena deka tano o Jovan Krstitel; javera o Ilija, a javera palem Eremija ili jek taro prorokja.“

¹⁵Ov vakjergja lenge: „A tumen so vakjerena, Koj sijum Me?“

¹⁶O Simon Petar odgovoringja hem vakjergja: „Tu sijan o Hristos,* Čhavo e Dživde Devleskoro.“

¹⁷O Isus odgovoringja hem vakjergja leske: „Blaženo sijan, Simon, čhavo taro Jonin, soske o telo hem o rat na otkringe tuke odova, nego Mlo Dat, Koj tano ki nebesa. ¹⁸Hem Me vakjerava tuke, deka tu sijan o Petar, a ko odova Bar ka izgradinav Mi crkva, hem o porte taro pekol nae te nadvladinen protiv late. ¹⁹Hem ka dav tut o klučia taro carstvo nebesno hem so hem da te phande ki phuv, ka pojavinelpes vekje phanlo ko nebo; hem so hem da te phrave ki phuv, ka ovel vekje phravdo ko nebo.“

²⁰Togaš zapovedingja Pe učenikonge te na vakjeren nikaske, deka Ovi tano o Isus Hristos.

²¹Ottogaš o Isus počmingja te sikavel lenge Pe učenikonge, deka sine potrebno baši Leske te džal za Erusalim hem te cidel but taro starešine, o glavna sveštenikja hem o knižnikja hem te ovel mudardo, hem ko trito dive te voskresninel.

²²A o Petar cidingjale ki strana hem počmingja te ukorinele, vakjeribaja: „O Devel te ovel milostivo ki Tute, Gospodar; odova nikogaš nae te ovel Tuke!“

²³A Ov irangjapes hem vakjergja e Petareske: „Naš pali Mande, satano! Tu sijan Mange prečka, soske mislineja na baši odova, soj tano Devleskoro, nego baši odova, soj tano manušikano.“

²⁴Togaš o Isus vakjergja Pe učenikonge: „Ako nekoj mangela te džal pali Mande, neka odrečinelpes pestar hem neka vazdel plo krsto hem neka sledinel Man. ²⁵Soske, koj mangela te spasinel pli duša, ka našavela; ama koj ka našavela pli duša baši Mange, ka arakhela. ²⁶Soske, savi korist ka ovel e manuše, ako pridobinela celo sveto, a pli duša našavela? Ili so ka del o manuš ki zamena baši pi duša? ²⁷Soske o Čhavo Manušikano ka avel ki slava Ple Dadeskiri, Ple angelencar, hem togaš ka del nagrada sekaske spored oleskere dejlja.

²⁸Čače vakjerava tumenge, deka maškar okola, koj tergjona akate, isi nekoj, koj nisar nae te vkusinen o meribe dži kote na dikhenale o Čhavo Manušikano te avel ko Plo carstvo.“

*Stiho 16: O Hristos ko grčki značinela Mesija, ili Pomazaniko.