O Isus predupredinela e fariseen

¹Togaš o Isus vakjergja e narodoske hem pe učenikonge, ²vakjeribaja: „E Mojseske ko than bešle o knižnikja hem o farisea, ³odoleske sa so ka vakjeren tumenge – kjeren hem pazinen – ama ma postapinen spored olengere dejlja, soske vakjerena, a na izvršinena! ⁴Nego phandena phare hem nepodnesliva pharipe hem čhivenale upro dumo e manušenge, a korkori na mangena ni najeja te pomrdinenlen.

⁵A sa ple dejlja kjerenalen, za da te dikhenlen o manuša; odoleske kjerenalen pobare ple molitvena zapisia hem kjerenalen bare o resia e šeengere; ⁶mangenalen: o čelna thana ko veselbe hem o prva thana ko sinagoge; ⁷o pozdravia ko javna thana hem o manuša te vikinenlen ‘Ravi.’

⁸A tumen ma narekujnen tumen ‘Ravi’ – soske tano jek tumaro Učiteli – o Hristos, a tumen sarine sijen phrajlja. ⁹Hem nikas ki phuv ma vakjerenle tumaro dat, soske tano Jek tumaro nebesno Dat. ¹⁰Nitu te narekujnen tumen nastavnikja, soske tano Jek tumaro Nastavniko – o Hristos. ¹¹A o pobaro maškar tumende neka ovel tumenge sluga. ¹²Koj vazdelape pes – ka ovel ponizimo, a koj ponizinelape pes – ka ovel vozvišimo.

¹³Kerko tumenge, knižnikja hem farisea, licemerna, koj phandenale o nebesno carstvo anglo manuša: soske korkori tumen na khuvena, nitu mukenalen andre okolen, koj mangena te khuven.

¹⁴Kerko tumenge, knižnikja hem farisea, licemerna, soske hanalen o khera e vdovicengere, hem baši odoja buti molinena tumen dugačko, odoleske ka dobinen pobari osuda.

¹⁵Kerko tumenge, knižnikja hem farisea, licemerna, koj obikolinena o more hem i phuv, za da te pridobinen jek sledbeniko, hem koga ka ovel odova, kjerenale čhavo e pekoleskoro, duj puti pološno tumendar!

¹⁶Kerko tumenge, korole vodačia, koj vakjerena: ‘Ako nekoj delapes sovli ko Hrami, nae tano ništo; ako pak delapes sovli e Hrameske ko zlato, togaš tano obvrzimo!’

¹⁷Bigogjakere hem korole! Soj tano pobaro: o zlato ili o Hrami, so osvetinelale e zlato? ¹⁸Hem: ‘Ako nekoj delapes sovli ko žrtveniko, nae tano ništo, a ako delapes sovli ko dari, soj tano upra leste, togaš tano obvrzimo.’ ¹⁹Korojralen! Soj tano pobaro: o dari ili o žrtveniko, so osvetinelale e dare? ²⁰Hem agjar, koj delapes sovli ko žrtveniko, delapes sovli ki leste hem ko sa soj tano upri leste. ²¹Hem koj delapes sovli ko Hrami, delapes sovli ki leste hem ko Okova, Koj živinela ki leste. ²²Hem koj delapes sovli ko nebo, delapes sovli e Devleske ko prestol hem ko Okova, Koj bešela ki leste.

²³Kerko tumenge, knižnikja hem farisea, licemerna, koj dena desetok taro nane, kopra hem kimin, a muklenle o považno ko Zakoni: i pravda, i milost hem i vera. Akava trebela sine te kjerelpes, a okova te na mukelpes! ²⁴Korole vodačia! Tumen cedinena e komarco, a progutinena e kamila!

²⁵Kerko tumenge, knižnikja hem farisea, licemerna, koj čistinena avrijaldan i čaša hem i činija, a andre ola tale pherde čoribaja hem alčna! ²⁶Koroleja farisej, očistin angleder andrale i čaša, za da hem te ovel čisto hem avrijaldan!

²⁷Kerko tumenge, knižnikja hem farisea, licemerna, soske preličinena ko makhle grobia, so avrijaldan dikhjovena šuže, a andre pherde mulikane kokaloncar hem sekova melalipe! ²⁸Agjar hem tumen avrijaldan sikavena tumen lenge pravedna e manušenge, a andrale sijen pherde so licemerstvo hem bezzakonie.

²⁹Kerko tumenge, knižnikja hem farisea, licemerna, koj gradinena lenge grobia e prorokonge hem ukrasinenalen lenge o spomenikja e pravednikongere, ³⁰hem vakjerena: ‘Ako živinaja sine ko dive amare dadengoro, na ka ova sine lengere součesnikja ko rat e prorokongoro.’ ³¹Agjar svedočinena baši tumenge, deka sijen čhave okolengere, koj mudargelen e prorokon. ³²Hem tumen dopheren i mera tumare dadengiri! ³³Sapalen, sapeskere porodia! Sar ka našen taro sudo e pekoleskoro?

³⁴Odoleske, ekje, Me bičhavava tumenge: prorokja hem mudrecia, hem knižnikja. Olendar jeken ka mudarenlen hem raspninen, a e javeren ka kamšikujnenlen ko tumare sinagoge hem ka goninenlen tari diz ki diz, ³⁵za da te avel upro tumende celo pravedno rat, soj čhordo ki phuv taro rat e pravedno Aveleskoro dži ko rat e Zaharijaskoro čhavo e Varahineskoro, kas so mudargenle maškar o Hrami hem o žrtveniko. ³⁶Čače vakjerava tumenge, sa odova ka avel upro akava pokolenie.

³⁷Erusalim! Erusalim, so mudareja e prorokon hem so lejalen barencar o bičhavde ki tute! Kozom puti mangljum te khedavlen te čhaven, sar so i kvačka khedelalen ple piličken telo paka, ama na manglen! ³⁸Ekje, mukelapes tumaro kher pusto! ³⁹Soske vakjerava tumenge: otakana nae te dikhen Man dži kote na vakjerena: ‘Blagoslovimo tano Okova, Koj avela e Gospodareske ko anav!’“