O propoved e Jovan Krstiteleskoro

¹Ko odola dive alo o Jovan Krstitel hem propovedinela sine ki pustina Judejsko, vakjeribaja: ²„Pokajnen tumen, soske alo paše o carstvo nebesno!“ ³Soske ovi tano okova, baši kaske o proroko Isaija vakjergja:

‘O glaso okoleskoro,
koj vikinela ki pustina:
„Spreminen o drumo e Gospodareskoro,
kjeren prava Oleskere drumia!“’

⁴A korkori e Jovane sinele šeja taro e kamilakere bala hem kožno pojas okolu ki polovina; a o skakulcia hem o divo avgin sine oleske hrana. ⁵Togaš ikljona sine ki leste: o Erusalim, celo Judeja hem celo Jordansko okolina, ⁶hem ov krstinela len sine ki reka Jordan, a ola ispovedinena sine pumare grevia.

⁷Štom dikhlja but farisea hem sadukea deka avena te krstinel len, vakjergja olenge: „Mileti sapeskoro, koj vakjergja tumenge te našen tari holi so avela? ⁸Odoleske, kjeren plodia dostojna baši pokajanie, ⁹hem ma mislinen te vakjeren ki tumende: ‘O Avraam tano amaro dad,’ soske vakjerava tumenge, o Devel šaj taro akala bara te vazdel čhave e Avraameske. ¹⁰O tover vekje pašljola ko koreno e kaštenge; odoleske sekova kaš, so na dela šukar plodi, čhinela pes hem frdela pes ki jag.

¹¹Me krstinava tumen ko pani baši pokajanie; ama Okova Koj avela pali mande tano posilno mandar, Kaskere me na sijum dostojno o sandale te ingarav len. Ov ka krstinel tumen ko Sveti Duh hem jag. ¹²I lopata tani ko Oleskoro vas, hem ka očistinel Plo gumno hem ka khedele Plo giv ko ambari; a i pleva ka tharela jagaja so na ačhola.“

O Isus krstinelape ko pani

¹³Togaš o Isus alo tari Galileja dži ko Jordan ko Jovan, za da te krstinel pes olestar. ¹⁴A o Jovan iranelale sine, vakjeribaja: „Man isi man potreba te krstinav man Tutar, a Tu aveja ki mande?“

¹⁵A o Isus odgovoringja leske: „Mukle akana odova, soske agjar bešela amenge te phera celo pravda.“ Togaš ov muklja Oleske.

¹⁶A koga o Isus sine krstimo, odma iklilo taro pani. Hem ekje, o nebesia phravdile Oleske hem dikhlja o Duho e Devleskoro te hulel sar gulubi hem te mukel pes upro Leste. ¹⁷Hem ekje, glaso taro nebesia vakjergja: „Akavaj tano Mlo manglo Čhavo, ki Kaste Mi milina tani!“