Matej 2

E mudrecongoro ajbe ko Isus

¹A koga o Isus bijasalilo ko Vitleem Judejsko, ko dive e caroskere o Irod, ekje, mudrecia taro istok resle ko Erusalim, ²hem vakjerge: „Kaj tano Ov koj bijasalilo, o Caro e Judejcongoro? Soske dikhlem Oleskiri čereni ko istok hem alem te poklonina amen Oleske.“

³Koga šungja odova, o caro o Irod voznemiringja pes, hem celo Erusalim oleja. ⁴Hem khedingja sa e glavno sveštenikon hem o narodna knižikja hem pučela len sine kote trebela te bijangjovel o Hristos.

⁵A ola vakjerge oleske: „Ko Vitleem Judejsko, soske o proroko pišingja agjar:

⁶‘Hem tu, Vitleeme, phuv Judino,
ko ništo na sijan potikno maškar o Judina vladetejlja,
soske tutar ka ikljol Vladeteli,
Koj ka ovel Pastiri Mle narodoske o Izrael.’“

⁷Togaš o Irod vikingja len tajno e mudrecon hem pazlivo siklilo olendar o vreme, koga pojavingja pes i čereni, ⁸hem bičhagja len ko Vitleem vakjergja lenge: „Džan hem pučen tumen sa točno baši o Čhavo, hem koga ka arakhenle, javinen mange, za da te avav hem meda te pokloninav man Oleske.“

⁹Ola, otkoga šungele e caro, cidinge, hem ekje, i čereni, so dikhlela ko istok, džala sine anglo lende dži kote na ali hem ačhili upro than kote sine o Čhavo. ¹⁰Hem koga dikhle i čereni, radujnge pes but bare radosteja. ¹¹Hem koga khuge ko kher, dikhle e Čhave Oleskere dajaja i Marija, hem pele ničkum hem pokloninge pes Leske; phrage pumare sandukja hem dengele bakšišia: zlato, temjan hem smirna.

¹²Hem otkoga opomeningja len o Devel ko suno, te na iranen pes ko Irod, gele palo javer drumo pumare phuvjate.

O našiba ko Egipet hem o iraniba

¹³A koga gele peske ola, ekje, e Gospodareskoro angeli javingja pes e Josifeske ko suno hem vakjergja oleske: „Ušti, le e Čhave, hem Oleskere daja, hem naš ko Egipet, hem ačhov odori dži kote na vakjerava tuke, soske o Irod ka rodele e Čhave za da te mudarele.“

¹⁴Hem ov uštilo, lelja e Čhave hem Oleskere daja rakjate, hem gele ko Egipet, ¹⁵hem odori sine dži ko e Irodeskoro meribe; za da te phergjovel o vakjerdo taro Gospodari preku o proroko koj vakjerela: ‘Taro Egipet vikingjumle Mle Čhave.’

¹⁶Togaš o Irod, koga dikhlja deka o mudrecia hovagele, holjangja but, pa bičhagja te oven mudarde, ko Vitleem hem ki celo oleskiri okolina, sa o murša čhave taro duj berš hem potikne, sprema o vreme so doznajngja točno taro mudrecia. ¹⁷Togaš pherdilo o vakjerdo taro proroko Eremija koga vakjergja:

¹⁸‘Glaso šungja pes ko Rama,
rojbe hem vikiba baro;
i Rahela rovela ple čhaven,
hem na mangela te smirinel pes,
soske nae tale.’

¹⁹A koga mulo o Irod, ekje, e Gospodareskoro angeli javingja pes e Josifeske ko suno, ko Egipet, ²⁰hem vakjergja oleske: „Ušti, le e Čhave hem Oleskere daja hem dža ki phuv izraelsko, soske mule okola koj rodena sine i duša e Čhaveskiri.“

²¹Hem ov uštilo, lelja e Čhave hem Oleskere daja, hem alo ki phuv izraelsko. ²²Ama koga šungja deka ki Judeja carujnela o Arhelaj, mesto o dad leskoro o Irod, darandilo te džal odori; nego opomeningjale o Devel ko suno, hem gelo ki okolina Galileja; ²³hem otkoga alo selingja pes ki diz vakjerdi Nazaret, za da te phergjovel o vakjerdo taro prorokja deka ka vakjerel pes Nazareco.