Slavinen e Gospodare!

¹Slavinen e Gospodare! Mli duša, falinle e Gospodare!

²Ka falinavle e Gospodare dži kote sijum dživdo, dži kote ovela man, ka giljavav mle Devleske.

³Ma nadinen tumen ko bare manuša so vladinena, nitu ko manušikane čhave, kastar nane spasenie!

⁴Ako lestar ikljola o duho, ov iranelape ki pi phuv, hem ko odova dive preperena sa oleskere plajna.

⁵Blago baši odova manuš, koj pomožinelale e Jakoveskoro Devel, kaskiri nadež tani ko Gospodari, oleskoro Devel,

⁶Koj kjergja: o nebo hem i phuv, o more, hem sa so isi ki lende; Koj ačhola verno zauvek.

⁷E maltretirimenge iranela lenge pravda, a e bokhalenge dela lenge maro. O Gospodari oslobodinela e phanlen.

⁸O Gospodari phravela o jajkha e korolengere, o Gospodari isprajnela okolen tejljarde tele soj tane, o Gospodari mangela len e pravednikon.

⁹O Gospodari zaštitinela e jabandžijen, pomožinela e čorole čhaven bizo dad soj tane hem okola udovice soj tane, a e grešnikongere drumia ruminela.

¹⁰O Gospodari ka carujnel zauvek; tlo Devel, Sion, taro koleno ko koleno. Slavinen e Gospodare!