Molitva baši vodiba hem zaštita

E Davideskoro Psalmi

¹Ki Tute, Gospodar, vazdava mli duša.

²Ki Tute nadinava man, mo Devel; ma muk te ladžakjerav man, za da ma te radujnenpe upra mande mle dušmajna.

³Čače nae te ladžakjerenpe okola, koj nadinenape ki Tute; ka ladžakjerenpe okola, koj prevarinena bizo pričina.

⁴Sikavlen mange, Gospodar, Tle drumia, sikav man ko Tle drumia!

⁵Vodin man ko Tlo čačipe hem sikav man, soske Tu sijan Devel mle spasenieskoro; ki Tute nadinava man celo dive.

⁶Setin Tut, Gospodar, baši Tlo vernost hem baši Tlo mangipe, soske ola tale taro večnost.

⁷Ma setin Tut baši o grevia mle ternipaskere, baši mle prestapia; setin Tut baši mande, o Gospodar! spored Tlo mangipe hem baši Tlo gudlipe!

⁸O Gospodari tano gudlo hem pravedno: odoleske ka sikavel lenge o drumo e grešnikonge.

⁹Ov vodinela e krotkon ki pravda, sikavelalen e krotkon ko Plo drumo.

¹⁰Sa e Gospodareskere drumia tane milost hem čačipa, baši okola koj arakhena Oleskoro zavet hem Oleskere svedoštvia.

¹¹Gospodar, baši Tlo anav, oprostin mo grevo, soske tano baro.

¹²Koj tano o manuš, koj darala taro Gospodari? Ole, Ov ka sikavele kova drumo te izbirinel.

¹³Oleskiri duša ka živinel rahati, a leskoro seme ka nasledinel i phuv.

¹⁴O Gospodari tano paše uzo okola, koj darana Olestar, hem ka sikavel olenge Plo zavet.

¹⁵Mle jajkha tane sekogaš sprema ko Gospodari, soske Ov cidelalen me pre tari mreža.

Molitva baši oslobodiba

¹⁶Dik man hem smilujn Tut mange, soske nane man nikoj hem sijum ma-zmi.

¹⁷O pharipe ko mlo srce barile, ikav man taro mle jadia!

¹⁸Dik mle nevolje hem muke hem oprostin sa mle grevia.

¹⁹Dik mle dušmanen: kobor tane but hem save bare mržnaja mrzinena man.

²⁰Arak mi duša hem spasin man: ma muk te ladžakjerav man, soske nadinava man ki Tute.

²¹O nevinost hem o poštenluko neka pazinen man, soske nadinava man ki Tute!

²²Gospodar, izbavin e Izraele, taro sa oleskere nevolje.