Bari nada ko Devel

E Davideskoro Psalmi

¹O Gospodari tano mi svetlina hem spasenie, kastar te darav? O Gospodari tano zaštita mle životoskoro, anglo kaste te ovel man dar?

²Koga ka aven paše uzi mande o bilačhe, mle protivnikja hem dušmajna, za da te han mli snaga, ola sopninenape hem perena.

³Ako i vojska uštela protiv mande, mlo srce na darala; ako izbuvninela hem vojna protiv mande, hem togaš sijum pherdo nadežeja.

⁴Baši jek molinava man e Gospodareske, samo odova rodava: te živinav ke Gospodareske ko kher, ko sa o dive mle životoskere; te uživinav ke Gospodareskoro šužipa, hem te istražinav ko Oleskoro Hrami.

⁵Ov garavela man ko Plo šatori, ko bilačho dive; garavela man ko garavutno than ko Plo šatori, Ov vazdela man ki karpa.

⁶Hem akana vazdava mo šero upro dušmajna soj okolu mande. Ka prinesinav radosna žrtve ko Oleskoro šatori, ka giljavav hem ka radujnav man ko Gospodari.

⁷O, Gospodar, šun mo glaso koga vikinava, ov mange milostivo hem odgovorin mange!

⁸Mo srce vakjerela: „Rode Mo muj!“ Oja, rodava Tlo muj, Gospodar.

⁹Ma garav Tlo muj mandar! Ma frdele ki holi Tle sluga! Tu, mli pomoš, ma otfrlin man! Hem ma muk man, Devla, mo Spasiteli!

¹⁰Ako mo dat hem mi daj mukena man, o Gospodari ka priminel man.

¹¹Sikav man, Gospodar, ko Tlo drumo, ingar man ko ramno drumo, baši mle protivnikja.

¹²Ma predajn man ko kjefi mle dušmanenge, soske hovavne svedokja uštile protiv mande, koj dišinena silaja.

¹³Verujnava deka ka uživinavlen e Gospodareskere šukaripa ki phuv e dživdengiri.

¹⁴Nadin tut ko Gospodari, ohrabrin tut! Neka ovel cvrsto tlo srce! Oja, adžikjerle e Gospodare!