O Devel arakhelale okole so nadinelape ki Leste

¹Tu koj bešeja te garave tut telal ko pokriv e Najbareskoro, so odmorineja tut teli senka taro Semokjno Koj ikjerela sa,

²vakjer Leske e Gospodareske: „Tu Koj sijan mo Than e garajbaskoro! Mli Tvrdina! Mo Devel, ki Kaste nadinava man!“

³Soske Ov ka oslobodinel tut tari stapica e lovdžijaskiri, tari čuma so mangela te uništinel tut.

⁴Ka arakhel tut Ple pakencar, ka garave tut telal Oleskere paka. Oleskoro čačipa tano štiti hem arakhela tut!

⁵Nae te dara tari e rakjakiri dar, nitu tari strelka so letinela diveja,

⁶ni tari čuma so garavelape čojrale taro karanluko, ni tari zaraza so uništinela pusto kjerela paloručko.

⁷Hem neka peren iljada uza tute, deš iljade dži ki tli desnica, ama uza tute nane te avel paše.

⁸Samo so ka dikhe te jajkhaja, vekje ka dikhe i plata e grešnikongiri.

⁹Soske o Gospodari tano tlo than kote so garaveja tut, izbiringjan e Najbare, kote ka beše te arakhel tut.

¹⁰Nae te arakhel tut bilačhipe, i nevolja nae te avel paše dži ko tlo šatori.

¹¹Soske ka zapovedinel Ple angelenge, te arakhen tut ko sa tle drumia.

¹²Ka ingaren tut ko vasta za da te na sopnine tut ko bar.

¹³Te preja ka gazine lavi hem otrovno sap, ka gazinelen e tikne lave hem e sape.

¹⁴„Ka izbavinavle soske mangela Man, ka arakhavle soske pendžarela Mo anav.

¹⁵Ka vikinel Man, a Me ka šunavle, oleja ka ovav ki nevolja, ka spasinavle hem ka proslavinavle.

¹⁶Ka čajljaravle bute divencar, ka sikavav leske Mo spasenie.