Tit 3
Spasingja amen pali Pli milost
1Potsetinlen te pokorinenpes e načalstvonge hem e vlastenge, te oven poslušna, te oven gotova baši sekova šukar delo, 2nikas te na hulinen, te na prepirinenpes, te oven mirna, te sikaven sekova krotkost ko sa o manuša.
3Soske hem amenda sijem sine nekogaš bizogogjakere, na pokorinaja amen sine, našavde taro pravo drumo, robia baši razno strastenge hem zadovolstvia, živibaja ko bilačhipe hem zavist, mrzime hem mrzinaja amen sine jek javereja.
4Ama koga javingepe: o šukaripa hem o mangipe e manušenge e Devleskoro, amaro Spasiteli, 5spasingja amen na upri osnova e pravedno delongiri so kjergemlen amen, nego pali Pli milost preku thojbe e nevebijanibaskoro hem so kjergja amen neve o Sveti Duh, 6Kas so izobilno čhorgja upri amende preku o Isus Hristos, amaro Spasiteli, 7ta opravdime preku Oleskiri blagodat te ova naslednikja spored i nadež taro večno životo. 8Verno tano odova slovo, hem mangava akava te ikjerele cvrsto; hem okola, koj verujnena ko Devel te grižinenpes te džan anglal ko šukar dejlja. Odovaj tano šukar hem korisno baši o manuša.
Izbeginlen akala bukja
9A izbeginlen: o glupava pučiba, o rodoslovie, o raspravie, hem o prepirke palo odnos e Zakoneskere, soske tane nekorisna hem suetna.
10Izbegin manuš so bange verujnela, palo prvo hem dujto opomena, 11džandipaja deka asavko manuš irangjapes hem deka grešinela, ta osudingjapes korkori pes.
Te oven prva ko šukar dejlja
12Koga ka bičhavavlen ki tute e Artema ili o Tihik, sigjar te ave ki mande ko Nikopol, soske rešingjum te nakhavav o jeven odori! 13Grižlivo snabdinlen baši drumoske o pravniko o Zina hem o Apolos, za da te ovelen sa so trebela lenge! 14Ama hem amare te sikljoven te oven prva ko šukar dejlja, kote soj tano odova čače potrebno, za da ma te oven bizo plodi.
15Pozdravinena tut sarine, koj tane mancar. Pozdravin okolen, koj mangena amen ki vera. I blagodat sarinencar tumencar. Amin!