Tit 2

Sar valjani te oven

¹A tu vakjer baši okova so složinelapes e saste naukaja: ²o phure te oven trezvena, česna, gogjavera, saste ki vera, ko mangipe, ko trpenie; ³isto agjar o pophure džuvlja te ponašinenpes sar so bešela e svetienge, te na klevetinen, te na predajnenpes but ki mol, nego te oven učitelke baši šukaripa, ⁴za da te sikaven e terne džuvlen te mangenlen pumare romen hem pumare čhaven, ⁵te oven gogjavera, čista, šukar domakice, pokorna pumare romenge, za da ma te hulinelpes e Devleskoro Slovo.

⁶Isto agjar, opomenin e ternen te oven sar so valjani gogjavera, ⁷dejbajatu tut ko sa sar primer baši šukar dejlja, ki nauka – bizo rumime bukja, dostoinstvo, ⁸sasto hem bizo te falinel disavo lafi, za da te ladžal sekova protivniko, te na ovele so te vakjerel bilačhe baši amenge.

⁹Opomenin e robon, za da te pokorinenpes pumare gospodarenge, te na ačhoven te ugodinen lenge, te na vakjeren lenge protiv, ¹⁰te na čoren, nego te sikaven pli šukar vernost, ta te ukrasinen ko sa i nauka amare Spasiteleskiri hem Devel.

E Devleskiri blagodat anela spasenie

¹¹Soske javingjapes e Devleskiri blagodat, koja anela spasenie baši o sa o manuša, ¹²koja vospitinela amen te otkažina amen taro bizodevlipa hem o svetska pohote, te živina gogjaver, pravedno hem devlikano ko avdisutno veko, ¹³adžikjeribaja i blaženo nadež hem o slavno javiba amare Semokjno Devleskiri hem Spasiteli, o Isus Hristos, ¹⁴Koj dengjapes Korkori Pes mesto amenge, za da te izbavinel amen taro sekova bezzakonie hem te očistinel baši Peske sopstveno narodo, koj pripadinela Oleske, koj prastana baši šukar dejlja.

¹⁵Vakjerle akava hem opomenin, hem vikin lenge celosno vlasteja, nikoj te na prezirinel tut!