О Исус бичхалела е Дешудује Џенен те проповединен

¹Хем викинѓален е Дешудује Џенен хем денѓален сила хем власт, упро са о нечиста духиа хем те сасќарен таро насвалипа. ²Хем бичхаѓален те проповединенле е Девлескоро Царство хем те сасќарен е насвален. ³Хем ваќерѓа ленге: „Ма лен туменцар ништо ко друмо: ни каш, ни торба, ни маро, ни паре! Ниту те овел тумен по дуј шеја. ⁴Хем ко саво кхер да те кхувен, ачховен хем одотхаре циден. ⁵Хем ако некој на приминела тумен, ко иклојбе тари оленгири диз, тресиненла и прашина таро тумаре пре, баши сведоштво против оленде!“

⁶Тогаш геле, хем џана сине ко гава, проповедибаја о Евангелие хем сасќарена сине сегде.

⁷А о владетели о Ирод шунѓа баши о са со овела хем сине ки бари буна, соске некој ваќерена сине дека о Јован воскреснинѓа таро муле; ⁸о јавера дека појавинѓапе о Илија; о трита палем дека уштило јек таро пуране пророќа.

⁹О Ирод ваќерѓа: „Е Јованескоро ме чхинѓум о шеро, ама кој тано акава баши каске шунава акала буќа?“ Хем родела сине те дикхеле.

О Исус паравела е народо

¹⁰А кога ирангепе о апостојља, ваќерге Леске са со ќерге. Хем лељален Пеја хем цидинѓапе ки страна ленцар карши и диз ваќерди Витсаида. ¹¹Ама штом о народо шунге баши одова, геле пали Лесте. Хем Ов приминѓален хем ваќерела сине ленге баши е Девлескоро Царство хем сасќарела сине околен, кас сине потреба баши те сасќовен.

¹²А кога о диве почминѓа те раќол, о Дешудуј Џене але хем ваќерге Леске: „Мук е народо те џан ко паше гава хем кхера, баши сојбаске хем хајбаске, соске акате сијем ко пусто тхан!“

¹³Ов пак ваќерѓа ленге: „Денлен тумен те хан!“

А ола ваќерге: „Нане амен повише таро панџ маре хем дуј мачхе; освен амен те џа хем те кина хајбаске баши са акава народо!“ ¹⁴Соске сине околу панџ илјаде мурша.

Хем ваќерѓа ленге Пе учениконге: „Бешаќерлен ко купе по пинда!“ ¹⁵Хем аѓар ќерге бешаќергелен саринен.

¹⁶Ов леља о панџ маре хем о дуј мачхе, дикхља ко небо; благословинѓа хем пхагљален хем делален сине е учениконге за да те чхивенлен англо народо.

¹⁷Хем сарине хале хем чалиле, хем ваздинге одова со ачхило таро котора – дешудуј корпе.

О Исус ваќерела англедер Пло мериба хем о воскресение

¹⁸Хем кога јек пути молинелапе сине коркори, а о учениќа сине Олеја, пучљален: „Со ваќерела о народо, Кој сијум Ме?“

¹⁹Ола пак одговоринге: „Јек ваќерена о Јован Крстител, јавера – о Илија, а трита – дека воскреснинѓа некој таро пуране пророќа.“

²⁰Тогаш ваќерѓа ленге: „А тумен со ваќерена, Кој сијум Ме?“

О Петар одговоринѓа: „О Христос е Девлескоро!“

²¹А Ов оштро заповединѓа ленге, никаске те на ваќерен одова; ²²ваќерѓа ленге дека о Манушикано Чхаво требела те цидел бут; те овел отфрлимо таро старешине, о главна свештениќа, хем книжниќа, те овел мудардо хем те воскреснинел ко трито диве.

²³Хем сариненге ваќерела сине: „Ако некој мангела те џал пали Манде, нека одречинелпес пестар хем нека лел пло крсто секова диве, хем нека слединел Ман! ²⁴Соске, кој мангела те спасинел пли душа – ка нашавела; а кој нашавела пли душа баши Манге, ов ка спасинела.

²⁵Соске, сави корист иси е мануше ако добинела цело свето, а коркори пес нашавела или упропастинела? ²⁶Соске, кој лаџала Мандар хем таро Мле лафиа, хем о Манушикано Чхаво ка лаџал олестар, кога ка авел ки Пли слава, хем ки слава е Дадескири хем е света ангеленгири. ²⁷Хем чаче ваќерава туменге, иси некој машкар акала, со терѓовена акате, кој нае те укусинен о мериба, џи коте на дикхена е Девлескоро Царство.“

О Исус изменинела По муј хем Пе шеја

²⁸А негде околу овто диве пало акала лафиа, лељален Пеја е Петаре, е Јоване, хем е Јакове хем уклило ки гора те молинелпе. ²⁹Хем џи коте молинелапе сине Олескоро муј изменинѓапе, а о шеја уле Лескере парне хем сјајнена сине. ³⁰Хем еќе, дуј мануша ќерена сине лафи Олеја; одова сине о Мојсеј хем о Илија, ³¹кола јавингепе ки слава хем ваќерена сине баши Олескоро мерибе, со требела сине те овел ко Ерусалим.

³²А бут хор сојба леља е Петре хем олескере амален. А кога уштиле, дикхле Олескири слава хем е дује муршен, кој терѓовена сине Олеја. ³³А кога ола џана песке сине Олестар – о Петар ваќерѓа е Исусеске: „Учителе, шукари тано те ова акате; ка ќера трин шатојра: јек баши Туке, јек баши о Мојсеј, јек баши о Илија“ – на џанела сине со ќерела лафи.

³⁴Хем џи коте Ов панда ваќерела сине одова, ало облако хем учхарѓален хем дарандиле, кога аракхлисалиле ко облако. ³⁵А таро облако ало гласо, кој ваќерела сине: „Акавај тано Мло Чхаво, Мло Избиримо! Шуненле Ле!“

³⁶Кога о гласо ачхило, о Исус аракхлисалило Коркори. Ола пак ќутинена сине хем никаске ништо на ваќерена сине ко одола диве, баши одова со дикхле.

О Исус сасќарела е чхаве астардо таро демони

³⁷А о јавер диве, кога хулена сине тари гора, бари гужва аракхљале. ³⁸Хем еќе, јек мануш таро народо викинѓа: „Учителе, молинава Тут, дик ко мло чхаво, соске тано манге единцо! ³⁹Еќе, о духо астарелале хем ов викинела таро јек пути, тресинелале аѓар, со икавела пена, бут малтретиринелале, едвај џала песке олестар. ⁴⁰Хем замолинѓум Тле ученикон, за да те палденле, ама нашти сине.“

⁴¹О Исус пак одговоринѓа хем ваќерѓа: „О, родо неверно хем румимо, џи кога ка овав туменцар хем џи кога ка трпинав тумен? Анале тле чхаве акате!“

⁴²Хем џи коте авела сине Лесте о чхаво, о духо фрдинѓале ки пхув хем почминѓа те тресинеле; ама о Исус нарединѓа хем палдинѓале е нечисто духо хем е чхаве сасќарѓа хем денѓале е дадеске.

⁴³Хем сарине чудингепе баши е Девлескоро барипе. Хем џи коте сарине чудиненапе сине баши са одова со ќерѓа, Ов ваќерѓа Пе учениконге: ⁴⁴„Шунен шукаре акала лафиа ко тумаре кана: о Манушикано Чхаво ка овел предајмо е манушенге ко васта!“ ⁴⁵Ама ола на халилеле одова лафи, соске сине гаравдо лендар, за да те на хајљовен, а дарана сине те пученле баши акава лафи.

Кој тано најбаро е Девлеске ко јајкха?

⁴⁶Хем али ленге мисла – кој олендар ка овел побаро? ⁴⁷А о Исус џанља и мисла таро ленгере срциа, леља јеке чхаве хем чхиѓале узи Песте, ⁴⁸хем ваќерѓа ленге: „Кој приминела акале чхаве ко Мло анав – Ман приминелама. А кој приминелама Ман, приминела Околе, Кој бичхаѓама Ман; соске, кој тано најтикно машкар сариненде туменде, ови тано баро.“

⁴⁹О Јован ваќерѓа: „Учителе, дикхлем јеке, кој палдела нечиста духиа ко Тло анав, хем забранингем леске, соске на авела аменцар.“

⁵⁰А о Исус пак ваќерѓа леске: „Ма браниненле – соске, кој нае тано против туменде – ови тано туменцар.“

О Исус цидела ко друмо ко Ерусалим

⁵¹А кога але паше о диве баши Олескоро ваздиба ко небо, Ов одлучинѓа те цидел ко друмо ко Ерусалим; ⁵²хем бичхаѓа манушен хаберџије англедер Лесте, ола геле хем кхуге ко јек самаријанско гав – те спреминен тхан баши Леске. ⁵³Ама на примингеле, соске Ов џала сине ко Ерусалим.

⁵⁴Кога дикхле одова о учениќа, о Јаков хем о Јован ваќерге: „Господар, мангеја ли те заповедина те хулел јаг таро небо хем те уништинелен, сар со ќерѓа хем о Илија?“

⁵⁵А Ов иранѓапе ки ленде хем иранѓа ленге оштро ваќерибаја: „Тумен на џанена таро саво духо сијен; ⁵⁶соске о Манушикано Чхаво на ало те уништинел о манушикане душе, ама те спасинелен.“ Хем геле ко јавер гав.

Англедер о са те следина е Исусе

⁵⁷Хем џи коте џана сине ко друмо, јек ваќерѓа Леске: „Ка слединав Тут коте хем да те џа.“

⁵⁸О Исус пак ваќерѓа леске: „Е лисицен исилен тхан кај те пашљовен хем о небесна чирикља исилен јуве, а е Манушикане Чхаве наеле коте те дајандинел По шеро.“

⁵⁹А е јавереске ваќерѓа: „Пхир пало Манде!“

Ама ов ваќерѓа: „Господар, дозволин манге најангледер те џав те парунав ме даде.“

⁶⁰ О Исус ваќерѓа леске: „Мук е мулен те парунен пумаре мулен. А ту џа хем проповединле е Девлескоро Царство!“

⁶¹Ваќерѓа хем о јавер: „Ме ка слединав Тут, Господар, ама дозволин манге прво те ресав ман мле кхерутненцар!“

⁶²О Исус пак ваќерѓа леске: „Никој, кој со чхиѓа по вас ко рало баши рандибаске ки нива, а дикхела палал, нае тано достојно баши е Девлескоро Царство.“