Матеј 1

О родослов е Исусе Христоскоро

¹Лил таро родослов е Исусе Христоскоро, чхаво Давидескоро, чхаво Авраамескоро:

²е Авраамеске бијасалило о Исак, е Исакоске бијасалило о Јаков, е Јаковеске бијасалиле о Јуда хем олескере пхрајља. ³Е Јудаске бијасалиле о Фарес хем о Зара тари Тамара, е Фаресeске бијасалило о Есром, а е Есромеске бијасалило о Арам, ⁴е Арамeске бијасалило о Аминадав, е Аминадавеске бијасалило о Насон, е Насонеске бијасалило о Салмон; ⁵е Салмонеске бијасалило о Вооз тари Рава, е Воозеске бијасалило о Овид тари Рута, е Овидeске бијасалило о Јесеј; ⁶е Јесејеске бијасалило о царо Давид. Е царoске е Давидеске бијасалило о Соломон тари е Уријаскири ромни. ⁷Е Соломонеске бијасалило о Ровоам, е Ровоамеске бијасалило о Авија, е Авијаске бијасалило о Аса, ⁸е Асаске бијасалило о Јосафат, е Јосафатеске бијасалило о Јорам, е Јорамeске бијасалило о Озија, ⁹е Озијаске бијасалило о Јоатам, е Јоатамeске бијасалило о Ахаз, е Ахазeске бијасалило о Езекија, ¹⁰е Езекијаске бијасалило о Манасија, е Манасијаске бијасалило о Амон, е Амонеске бијасалило о Јосија, ¹¹е Јосијаске бијасалиле o Јехонија хем олескере пхрајља ко време преселибаскоро ко Вавилон.

¹²Пали Вавилонско преселба, е Јехонијаске бијасалило о Салатиел, е Салатиелеске бијасалило о Зоровавел, ¹³е Зоровавелеске бијасалило о Авијуд, е Авијудeске бијасалило о Елијаким, е Елијакимеске бијасалило о Азор, ¹⁴е Азореске бијасалило о Садок, е Садокеске бијасалило о Ахим, е Ахимеске бијасалило о Елијуд, ¹⁵е Елијудeске бијасалило о Елеазар, е Елеазареске бијасалило о Матан, е Матанеске бијасалило о Јаков, ¹⁶е Јаковеске бијасалило о Јосиф, о ром е Мариjакоро, кој бијанѓа е Исусе, ваќердо Христос*.

¹⁷Хем аѓар са о родовиа таро Авраам џи ко Давид тале дешуштар родовиа; хем таро Давид џи ки преселба ко Вавилон дешуштар родовиа; хем и преселба ко Вавилон џи ко Христос дешуштар родовиа.

Е Исусескоро бијанибе

¹⁸А о бијанибе е Исусе Христоскоро уло аѓар: кога Олескири дај и Марија сине верими е Јосифеске, англедер те овен заедно, араклисалили кхамни таро Свети Дух. ¹⁹А олакоро ром о Јосиф, соске сине праведно хем на мангела сине јавно те лаџаќерела, мислинѓа те мукела тајно.

²⁰Ама штом помислинѓа одова, еќе, е Господарескоро ангели јавинѓапе леске ко суно хем ваќерѓа леске: „Јосиф, чхаво е Давидескоро, ма дара те ле е Марија, те ромња, соске о зачнимо ки олате тано таро Свети Дух. ²¹Ој ка бијанел Чхаво хем ту ка деле о анав Исус*, соске Ов ка спасинел Пле народо таро оленгере гревиа.“

²²А са одова уло за да те пхерѓол окова, со о Господари ваќерѓа преку о пророко, кој ваќерела: ²³‘Еќе, чхај ка ачхол кхамни хем ка бијанел Чхаво, хем ка ваќеренле Емануел,’ кова ко превод значинела: ‘О Девел аменцар!’

²⁴А кога о Јосиф џангавдило таро суно, ќерѓа сар со заповединѓа леске е Господарескоро ангели, леља пе ромња. ²⁵Ама о Јосиф запазинѓа е Марија сар чхај са џи коте ој на бијанѓа Чхаво, Каске ов денѓале о анав Исус.

*Стихо 16: О Христос ко грчки значинела Месија, или Помазанико.
*Стихо 21: О анав Исус значинела „О Господари спасинела.“