О работниќа ко дракха

¹„Соске о небесно царство бешела манушеске домакини, кој иклило рано сабајле те лел работниќа баши пле дракха. ²Хем кога погодинѓапес е работниконцар по денариј* ко диве, бичхаѓален ко пле дракха.

³Хем кога иклило палем негде о трито саати, дикхља јавера ко тхана со бикинелапе сар терѓона, бизо бути, ⁴хем ваќерѓа ленге: ‘Џан хем тумен ко мле дракха, па ка дав тумен со ка овел право!’ ⁵Хем ола геле.
А кога иклило палем негде шовто саати хем о ејнато саати, ќерѓале о исто.

⁶А негде дешујекто саати палем иклило хем аракхља јавера, сар терѓона, хем ваќерѓа ленге: ‘Соске терѓона акате цело диве бизо бути?’

⁷Ваќерге леске: ‘Никој на леља амен.’
Ов ваќерѓа ленге: ‘Џан хем тумен ко мле дракха.’

⁸А кога ратило о господари е дракхенгоро ваќерѓа пле управителеске: ‘Викин е работникон хем платинлен, почмин таро последна па џи ко прва!’

⁹Хем аѓар, со але негде о дешујекто саати приминге по денариј. ¹⁰Кога але о прва, помислинге дека ка приминен повише, ама хем ола приминге по денариј.

¹¹Штом приминге, почминге те жалиненпе против о домакини, ¹²ваќерибаја: ‘О последна ќерге бути јек саати, а ту денѓанлен исто аменцар, кој претрпингем о пхарипе е дивескоро хем о татипе!’

¹³А ов одговоринѓа јекеске таро олендар хем ваќерѓа: ‘Амала, на ќерава туке неправда, зарем на погодинѓан тут манцар баши денариј? ¹⁴Ле тло хем џа туке, а ме мангава баши о последно те дав кобор хем туке. ¹⁵Или зарем нае ман право те ќерав со мангава млеја? Или пак ти јак тани билачхе, соске сијум шукар?’

¹⁶Аѓар о последна ка овен прва, а о прва последна; соске бут џене тале повикујме, а хари тане избириме.“

О Исус џала ко Ерусалим Пе учениконцар

¹⁷Хем кога о Исус уклела сине ко Ерусалим, леља е Дешудује Џенен насамо хем ваќерѓа ленге ко друмо: ¹⁸„Еќе, џаја упре, ко Ерусалим, хем о Манушикано Чхаво ка овел ленге предајмо е прво свештениконге хем е книжниконге, хем ка осудиненле ко мериба, ¹⁹хем ка предајненле е неверниконге, за да те асан Леске, те камшикујненле хем те распниненле, хем ко трито диве ка воскреснинел.“

²⁰Тогаш и дај е Заведескере чхавенгири али Леске заедно пле чхавенцар, поклонинѓапес Леске, за да те замолинеле нешто Оле.

²¹А Ов ваќерѓа лаке: „Со мангеја?“
Одговоринѓа Леске: „Заповедин акала мле дуј чхаве те бешен, јек тари Тли десно, а о јавер тари Тли лево страна, ко Тло Царство!“

²²А о Исус одговоринѓа хем ваќерѓа: „На џанена со родена! Шај ли те пијенла и чаша, со ка пијавла Ме, или те крстинен тумен е крштевајнеја колеја со крстинава Ман Ме?“
Ваќерге Леске: „Шај.“

²³Ваќерѓа ленге: „Мли чаша ка пијенла; хем е крштевајнеја колеја крстинава Ман Ме, ка крстинен тумен; ама те бешелпе тари Мли десно или лево страна, одова на давале Ме, него ка припадинел ленге околенге, баши кој Мло Дат спреминѓа.“

²⁴Хем кога шунге одова о деш џене, хољанге е дује пхраленге. ²⁵А о Исус повикујнѓален хем ваќерѓа: „Џанена дека о владетејља е народонгере господаринена упро ленде хем дека о баре владиненален. ²⁶Нека ма те овел аѓаре машкар туменде! Него, кој мангела те овел баро машкар туменде, нека овел туменге слуга! ²⁷Хем кој мангела те овел прво машкар туменде, нека овел туменге слуга; ²⁸сар со о Манушикано Чхаво на ало те служинен Леске, него те служинел хем те дел Пли душа баши откуп буте џененге.“

²⁹А кога иклиле таро Ерихон, бари гужва цидинѓа пали Лесте. ³⁰Хем еќе, дуј короре, бешена сине уза ко друмо, шунге дека о Исус накхела, хем викинге ваќерибаја: „Господар, Давидескоро Чхаво, смилујн Тут аменге!“

³¹А и гужва заканинѓапес ленге те ќутинен, а ола викинге панда посилно: „Господар, Давидескоро Чхаво, смилујн Тут аменге!“

³²Хем о Исус ачхило, повикинѓален хем ваќерѓа: „Со мангена те ќерав туменге?“

³³Ваќерге Леске: „Господар, те пхравѓон амаре јајкха!“

³⁴Хем о Исус смилујнѓапе ленге хем допринѓа оленгере јајкха; хем одма дикхле хем цидинге пали Лесте.

*Стихо 2: Јек денариј ко адава време тано вредност сар јек диве плата баши јек работнико.