О проповед е Јован Крстителескоро

¹Ко одола диве ало о Јован Крстител хем проповединела сине ки пустина Јудејско, ваќерибаја: ²„Покајнен тумен, соске ало паше о царство небесно!“ ³Соске ови тано окова, баши каске о пророко Исаија ваќерѓа:

‘O гласо околескоро,
кој викинела ки пустина:
„Спреминен о друмо е Господарескоро,
ќерен права Олескере друмиа!“’

⁴А коркори е Јоване синеле шеја таро е камилакере бала хем кожно појас околу ки половина; а о скакулциа хем о диво авгин сине олеске храна. ⁵Тогаш икљона сине ки лесте: о Ерусалим, цело Јудеја хем цело Јорданско околина, ⁶хем ов крстинелален сине ки река Јордан, а ола исповединена сине пумаре гревиа.

⁷Штом дикхља бут фарисеа хем садукеа дека авена те крстинелен, ваќерѓа оленге: „Милети сапескоро, кој ваќерѓа туменге те нашен тари холи со авела? ⁸Одолеске, ќерен плодиа достојна баши покајание, ⁹хем ма мислинен те ваќерен ки туменде: ‘О Авраам тано амаро дат,’ соске ваќерава туменге, о Девел шај таро акала бара те ваздел чхаве е Авраамеске. ¹⁰О товер веќе пашљола ко корено е каштенге; одолеске секова каш, со на дела шукар плоди, чхинелапес хем фрделапес ки јаг.

¹¹Ме крстинава тумен ко пани баши покајание; ама Окова Кој авела пали манде тано посилно мандар, Каскере ме на сијум достојно о сандале те ингаравлен. Ов ка крстинел тумен ко Свети Дух хем јаг. ¹²И лопата тани ко Олескоро вас, хем ка очистинел Пло гумно хем ка кхеделе Пло гив ко амбар; а и плева ка тхарела јагаја со на ачхола.“

О Исус крстинелапе ко пани

¹³Тогаш о Исус ало тари Галилеја џи ко Јордан ко Јован, за да те крстинелпес олестар. ¹⁴А о Јован иранелале сине, ваќерибаја: „Ман иси ман потреба те крстинав ман Тутар, а Ту авеја ки манде?“

¹⁵А о Исус одговоринѓа леске: „Мукле акана одова, соске аѓар бешела аменге те пхера цело правда.“ Тогаш ов мукља Олеске.

¹⁶А кога о Исус сине крстимо, одма иклило таро пани. Хем еќе, о небесиа пхравдиле Олеске хем дикхља о Духо е Девлескоро те хулел сар гулуби хем те мукелпес упро Лесте. ¹⁷Хем еќе, гласо тари небеса ваќерела сине: „Акавај тано Мло мангло Чхаво, ки Касте Ми милина тани!“