Е Исусескоро проповед ки гора

¹Кога дикхља бут народо, уклило ки гора; откога бешља, але Олескере учениќа, ²хем кога пхраѓа По муј, сикавелален сине, ваќерибаја,

³„Блажена тане о чороле ко духо, соске тано оленгоро о царство небесно!

⁴Блажена тане окола кој тугујнена, соске ола ка овен утешиме!

⁵Блажена тане о кротка, соске ола ка наслединен и пхув!

⁶Блажена тане кој бокхале хем жедна баши правда, соске ола ка чајљовен!

⁷Блажена тане о милостива, соске ола ка овен помилујме!

⁸Блажена тане о чиста ко срце, соске ола ка дикхен е Девле!

⁹Блажена тане мир со ќерена, соске ола ка овен ваќерде чхаве Девлескере!

¹⁰Блажена тане окола кој тане гониме баши правда, соске оленгоро тано о царство небесно!

¹¹Блажена сијен кога ка наврединен тумен хем гонинен тумен хем ваќерена ховајба против туменде, разна билачхе лафенцар, баши Манде. ¹²Радујнен тумен хем веселинен тумен, соске бари тани тумари награда ки небеса, соске аѓар гонинена сине е пророкон, кола сине англедер туменде.

¹³Тумен сијен о лонд ки пхув, ама ако о лонд овела билондало, солеја ка лонѓаќерелпес? Веќе наеле сила баши ништо освен те овел фрдимо аври хем о мануша те газиненле.

¹⁴Тумен сијен и светлина е светоскири. Диз која пашљола ко ридо, нашти те гаравелпес; ¹⁵ниту тхарелапес момоли, за да те чхивелпес тели корпа, него ки лампа, хем светинела сариненге кој тале ко кхер. ¹⁶Аѓар нека светинел тумари светлина англо мануша, за да те дикхен тумаре шукар дејља хем те прославинен тумаре Даде, Кој тано ки небеса.

¹⁷Ма мислинен дека аљум те поништинавлен е Законе хем е Пророкон! На аљум те поништинавлен, него те исполнинавлен. ¹⁸Соске чаче ваќерава туменге, џи коте на накхена о небо хем и пхув, ниту и најтикни буква, ни цртичка, нае те нашаѓовел таро Закони, џи коте на овела са.

¹⁹Хем аѓар, кој ка рушинел јек таро акала најтикне заповедиа хем аѓар сикавела е манушен, ка овел ваќердо најтикно ко царство небесно; а кој иќерелален хем сикавелален, ка овел ваќердо баро ко царство небесно; ²⁰соске ваќерава туменге, ако тумари праведност на накхавела и праведност таро книжниќа хем фарисеа, нае те кхувен ко царство небесно.

²¹Шунген дека сине ленге ваќердо е пураненге: ‘Ма мудар! А кој ка мударел, ка овел криво англо судо.’ ²²А Ме ваќерава туменге, дека секој, кој делапес ки холи пе пхралеске бизо ништо, ка овел криво англо судо. А кој ка ваќерел пе пхралеске, ‘чуче шерескереја,’ ка овел криво англо Врховно судо. А кој ка ваќереле ‘бигоѓакереja,’ ка овел криво баши ко јагакоро пекол.

²³Хем аѓар, ако принесинеја тло дари ко олтари хем спомнинеја одори дека то пхрал исиле нешто против туке, ²⁴мукле одори тло дари англо олтари, хем џа прво смирин тут те пхралеја, па тогаш ава хем принесин тло дари.

²⁵Сикав сигате шукар војља ко тло противнико, џи коте сијан панда олеја ко друмо, за да ма те предајнел тут о противнико е судијаске, а о судија е служителеске, па те фрден тут ко пханлипе. ²⁶Чаче ваќерава туменге: нае те икљове одотхаре, џи коте на исплатинеја хем о последно денариј.

²⁷Шунген дека сине ленге ваќердо е пураненге: ‘Ма ќер прељуба!’ ²⁸А Ме ваќерава туменге дека секој, кој дикхела ки џувли желбаја, веќе ќерѓа прељуба олаја ко пло срце. ²⁹Ако тли десно јак чхивела тут ко грево те пере, икала хем фрдела тутар; соске тано пошукар те пропадинел јек таро члејна, отколку цело тло тело те овел фрдимо ко пекол. ³⁰Хем ако тло десно вас чхивела тут ко грево те пере, чхинле фрделе тутар; соске тано пошукар те пропадинел јек таро тле члејна, отколку цело тло тело те џал ко пекол.

³¹Исто аѓар сине ваќердо: ‘Кој ка мукел пле ромња, нека хем дела разводно лил.’ ³²А Ме ваќерава туменге дека секој, кој мукела пле ромња, освен баши прељуба, чхивелала те ќерел прељуба, хем кој женинелапес аѓар напуштиме џувљаја, ќерела прељуба.

³³Панда шунген, дека сине ленге ваќердо е пураненге: ‘Ма де совли ховавне, а иќерлен англо Господари те совља.’ ³⁴А Ме ваќерава туменге: ма ден тумен совли никако; ниту ко небо, соске тано е Девлескоро престол; ³⁵ниту ки пхув, соске тани телал Олескере пренге; ниту ко Ерусалим, соске тани диз е баре Цароскири. ³⁶На ка де тут совли ни ко тло шеро, соске нашти нијек бал те ќерела парни или кали! ³⁷Него тумаро лафи нека овел: оја, оја – на, на! Сој тано повише таро одова, таро билачхо тано.

³⁸Шунген дека сине ваќердо: ‘Јак јајкхаке хем дант дандеске.’ ³⁹А Ме палем ваќерава туменге: ма противинен тумен е билачхеја; него ако некој кхувела тут ки тли десно чхам, иран леске хем и јавер. ⁴⁰Ако некој мангела те судинелпес туја хем те лел тутар то гад, мук леске хем и наметка. ⁴¹Ако некој чхивела тут те џа олеја јек километар, ту џа дуј олеја. ⁴²Де околе со родела тутар, хем ма иран тут околестар со мангела борџи тутар.

⁴³Шунген дека сине ваќердо: ‘Манг те паше хем мрзин те душмане.’ ⁴⁴А Ме ваќерава туменге: Манген тумаре душманен хем молинен тумен баши окола, со гонинена тумен; ⁴⁵за да те овен чхаве тумаре Дадескере, Кој тано ки небеса, Кој ќерела Олескоро кхам те таќарел упро о билачхе хем упро о шукарe, хем дела бршим е праведнонге хем е неправеднонге. ⁴⁶Соске ако мангена околен, кој мангена тумен, сави награда иси тумен? Зар хем о цариниќа на ќерена одова исто? ⁴⁷Хем ако поздравинена само тумаре пхрален, со појавер ќерена? Зар на ќерена исто хем о цариниќа?

⁴⁸Хем аѓар, овен совршена, сар сој тано совршено тумаро небесно Дат.“