¹„Пазинен те на ќерен тумари праведност англо мануша, за да те дикхен тумен ола; инаку нае тумен награда таро тумаро Дат, Кој тано ки небеса.

²Хем аѓаре, кога деја некас те поможине, ма трубин англи туте, сар со ќерена о лицемејра ко синагоге хем ко улице, за да те овен славиме таро мануша. Чаче ваќерава туменге, исилен пли награда. ³А ту, кога деја некас те поможине, нека ма те џанел ти левица, со ќерела ти десница, ⁴за да те овел тло дејбе ко тајност; хем тло Дат, Кој дикхела ко тајност, ка наградинел тут јавно.

⁵Хем кога молинена тумен, ма овен сар о лицемејра, кој мангена те молиненпес тердиндор ко синагоге хем ко ќушиа таро улице, за да те дикхенлен о мануша; чаче ваќерава туменге, исилен пли награда. ⁶А ту, кога молинеја тут, кхув ки тли гаравди соба, пхан о удара хем молин тут тле Дадеске, Кој тано ки тајност; хем тло Дат, Кој дикхела ко тајност, ка наградинел тут јавно.

⁷А кога молинена тумен, ма користинен чуче повториме лафиа сар о народо; соске мислинена дека ка овен шунде баши о побут лафиа. ⁸Хем аѓар, ма овен сар ленде, соске тумаро Дат џанела сој туменге тано потребно, панда англедер те молиненле.

⁹Него молинен тумен аѓар:

‘Мо Дат амаро, Кој сијан ки небеса, те светинелпес Тло анав;

¹⁰те авел Тло царство, те овел Тли војља, сар ко небо, аѓар хем ки пхув;

¹¹амаро шуко маро, де амен авдије;

¹²хем опростин аменге амаре борџиа, сар со хем амен опростинаја амаре борџлијенге;

¹³хем ма ингар амен ко искушение, ама избавин амен таро билачхо, соске Тлој тано о царство хем и сила хем и слава, ко са о вејќа, амин!’

¹⁴Соске, ако тумен опростинена е манушенге оленгере престапиа, тумаро небесно Дат ка опростинел хем тумаре. ¹⁵Ако тумен на опростинена е манушенге оленгере престапиа, ни тумаро Дат нае те опростинел тумаре.

¹⁶А кога постинена, ма овен ма-зми сар о лицемејра; соске ола ќерена ма-зми пло муј, за да те дикхенлен о мануша дека постинена; чаче ваќерава туменге, исилен пли награда. ¹⁷А ту кога постинеја, помазин тло шеро хем тхов тло муј, ¹⁸за да те на дикхен тут о мануша дека постинеја, ама тло Дат, Кој тано ко тајност; хем тло Дат, Кој дикхела ко тајност, ка наградинел тут јавно.

¹⁹Ма кхеден барвалипе ки пхув коте со о молцо хем и 'рѓа уништинелален, хем коте со о чора пхагена, кхувена хем чорена, ²⁰него кхеден барвалипе ко небо, коте со ни о молцо, ниту и 'рѓа на уништинелален, хем коте со о чора на пхагена, кхувена хем чорена; ²¹соске коте тано тло барвалипе, одотхе ка овел хем тло срце.

²²О светило е телоскоро тани и јак. Хем аѓар, ако тли јак тани бистро, цело тло тело ка овел осветлимо; ²³ама ако тли јак тани билачхе, цело тло тело ка овел каранлуко. Хем аѓар, ако и светлина, сој тани ки туте, тани каранлуко, кобор би ка овел о каранлуко!

²⁴Никој нашти те служинел дује господаренге; соске или јек ка мрзинеле, а о јавер ка мангеле; или ка овел поврзимо јекеја, а о јавер ка презиринеле. Нашти те служинен е Девлеске хем е мамонеске*.

²⁵Одолеске ваќерава туменге: ма секиринен тумен баши тумари душа, со ка хан или со ка пијен; ниту баши тло тело, со ка уравен. Зар и душа нае тани повише тари храна, хем о тело таро шеја? ²⁶Дикхенлен е чириклен небесна! Ола ниту сејнена, ниту жнејнена, ниту кхедена ко амбари, хем палем тумаро небесно Дат паравелален. Зар на сијен вредна бут повише олендар? ²⁷Кој тумендар шај секирибаја те продолжинел пло живот, макар само јек саати?

²⁸Соске секиринена тумен хем баши шеенге? Дикхен о полска лулуѓа сар бајрона; на трудиненапес, ниту плетинена; ²⁹а Ме ваќерава туменге дека ни о Соломон, ки цело пли слава, на ураѓапес сар јек олендар. ³⁰Хем, ако о Девел уравела аѓар и полско чар, со авдије тани, а тајса фрденала ки печка, нае ли бут повише тумен, тикневеракере?

³¹Хем аѓар, ма секиринен тумен, ваќерибаја: ‘Со ка ха?’ Или: ‘Со ка пија?’ Или: ‘Со ка урава?’ ³²Соске са одова родена о народиа, соске тумаро небесно Дат џанела дека туменге тано потребно са акава. ³³Ама, роден прво о царство е Девлескоро хем Олескири правда, хем са одова ка додајнелпес туменге.

³⁴Хем аѓар, ма секиринен тумен баши тајсутно диве, соске о тајсутно диве ка секиринелпес баши песке. Доста тано секоле дивеске олескоро билачхипе.“

*Стихо 24: О лафи Мамон ки арамејско чхип значинела о паре или о барвалипа.