Ефесјајна 3
И тајна е Христоскири
1Одолеске ме, о Павле, сијум затворнико е Христа Исусескоро баши туменге е народонге со на сијен Евреа. 2Сигурно шунген, баши и задача која манге тани денди таро Девел, баши Олескири благодат те проповединавла туменге со на сијен Евреа; 3дека о Девел откринѓа хем ваќерѓа манге и тајна, сар со поангле ко кратко пишинѓум туменге. 4Читибаја отхар шај те хајловен со иси ман ки годи со мангава те ваќерав баши и тајна е Христоскири, 5која со ко јавера поколениа на сине ленге пхенди е манушикане чхавенге, сар со акана преку о Духо тани открими Олескере света апостоленге хем пророконге.
6И тајна иќерелапе ко одова дека окола со нае Евреа уле наследниќа е Евреенцар, припадинена исто телоске, хем дека учествинена ко ветување кова о Девел исполнинѓале ко Христос Исус преку о Евангелие, 7баши каске уљум служители, спрема о дари тари е Девлескири благодат, која тани манге денди спрема тари Олескири сила со делујнела.
8Манге – о најтикно таро са о света – денди тани манге акаја благодат: те ваќерав е народонге баши е Христоскоро барвалипа козоми тано баро со наеле крајо, нашти те опишинелпе, 9хем сариненге те расветлинав сој е Девлескоро плани, кова тари вечност сине тајна гаравди ко Девел – о Создатели баши о са; 10за да те откринелпе е Девлескири мудрост со исила бут стране, акана преку и црква баши о началствиа хем о властиа ко небесна тхана, 11спрема Пли вечно намера, која ќерѓала ко Христос Исус, амаро Господари, 12ки Касте иси амен сигурност бизо дар те ава ко Девел, пхерде довербаја – преку и вера ки Лесте. 13Одолеске молинава тумен, те на чхинѓовен хем те на нашавен тумари нада баши мле невоље, со аракхле ман баши туменге: олај тумари слава.
Е Христоскоро мангипа накхавела о џандипа
14Баши одова перава ко кочака англо о Дат амаре Господарескоро о Исус Христос, 15Кастар секова родо ки небеса хем ки пхув добинела анав; 16те дел тумен, спрема о барвалипа тари Пли слава – те зојраќерел тумен андралдан ки туменде е силаја преку Олескоро Духо, 17та преку и вера те живинел о Христос ко тумаре срциа: те овен вкорениме хем темелиме ко мангипе; 18за да те шај те сватинен са е светиенцар, сој тано ширина хем дужина, хем учипа хем хор, 19хем те пенџарен е Христоскоро мангипа, кова накхавела о џандипа: за да те пхерѓовен тумен целосно е Девлеске ки полнота.
20А Околеске, Кој Пле силаја, со делујнела ки аменде, шај те ќерел бут повише упредер о са со амен молинаја или мислинаја, 21Олеске некај тано слава ки црква хем ко Христос Исус ко са о поколениа таро веќа ко веќа! Амин!