О Христос тано о Шеро

¹Одолеске молинава тумен, ме кој сијум затворнико баши о Господари, те живинен достојно спрема о повик ко кова сијен викиме. ²Те овен понизна, кротка, трпелива, те поднесинен тумен јек јекеја мангипаја! ³Дикхен те аракхенле о јекипе пханло е миреја, кова о Духо дела тумен.

⁴Јек тело хем јек Духо, сар со сијен хем тумен викиме ки јек надеж ко тумаро повик; ⁵јек Господари, јек вера хем јек крштевање; ⁶јек Девел хем Дат сариненгоро, Кој тано упредер о сарине, хем преку сарине хем ко сарине.

⁷А секаске амендар денди тани и благодат спрема и мерка таро е Христоскоро дари. ⁸Одолеске о Свето Писмо ваќерела:

⁹А „ваздисалило“ – со значинела, јавер него дека хулило прво ко телуне тхана тари пхув? ¹⁰Ов Кој хулинѓа, одовај тано Окова исто, Кој ваздисалило упредер о са о небесиа, за да те пхерел са.

¹¹Xем Ов денѓа јек баши апостојља, о јавера баши пророќа; јек баши евангелистиа, а јавера баши пастијра хем учитејља, ¹²за да те овен спремна о светие баши о дело те служинен, хем те градинелпес е Христоскоро Тело, ¹³џи коте сарине на аваја џи ко јекипе ки вера хем ко пенџариба е Девлескере Чхаве, џи ко совршено мануш, џи ки асавки мерка пхерди, ресле е Христоске ко барипа, ¹⁴за да ма те ова веќе чхаве, кој нишинелален хем ингарелален секоја бавлал таро ховавно учиба, со – е манушикане ховајбаја хем далавераја – анела џи ко џанде измислиме заблуде.

¹⁵Него, ваќериндор о чачипе мангипаја, амен требела те бајрова ко са – ки Лесте, Кој тано Шеро, о Христос. ¹⁶Олестар цело Тело тано пханло хем иќерелапе ко јек, ко асавко начин со секова дело дела подршка козом со валјани јек мерка баши секова дело; одолеја ќерела о Тело те бајрол, за да те градинелпе ко мангипе.

Неве мануша ко Христос

¹⁷Акава ваќерава хем сведочинава ко Господари, те на живинен веќе сар со живинена о мануша со на џанена е Девле, ко чучо пле гоѓаја. ¹⁸Каранлуко иси ки ленгири годи, дујрарде тане таро е Девлескоро живото, баши о биџандипе кова владинела ки ленде, соске зорале коракоро тано оленгоро срце. ¹⁹Откога нашагеле по савест, ола хем предајнгепе пес ко румиме буќа, за да те ќерен разна мелале буќа, со само дикхена те лен ко корист песке.

²⁰А тумен на сиклилен аѓаре таро Христос. ²¹Сигурно шунген баши Олеске хем сиклилен Олестар дека о чачипе тано ко Исус. ²²Спрема таро тумаро англутно живото, тумен требела те хуљавен тумендар о пурано мануш, кој руминѓовела баши о ховавне страсна желбе, ²³хем те променинен тумен андре ко духо сар размислинена ки тумари годи, ²⁴хем те уравен тумен ко нево мануш, кој тано ќердо спрема о Девел, ки чачикани правда хем светост.

²⁵Одолеске фрден о ховајба хем ‘ваќерен о чачипа секој пле пашеја,’ соске сијем члениа јек јекеја! ²⁶‘Ако сијен хољаме, ма грешинен!’ О кхам те на зајдинел ки тумари холи, ²⁷хем ма ден тхан е бенгеске!

²⁸Кој чорѓа, те на чорел веќе! Пошукар тано те трудинелпес хем те ќерел бути пле вастенцар одова сој тано шукар, за да те шај те дел околеске, кас иси потреба!

²⁹Нисаво билачхо лафи те на икљол таро тумаро муј, него само шукар лафи, баши те изградинен тумен – коте тано потребно, за да те дел благодат баши окола кој шунена.

³⁰Хем ма жалостинен о Свети Дух Девлескоро, Колеја сијен запечатиме баши о диве е избавибаскоро!

³¹Секова ќеркипа, хем холи, хем хољаниба, хем викиба хем хулиба, те овен отстраниме тумендар, секоле билачхипаја. ³²Овен јек јекеске шукар, милостива, опростинен тумен јек јекеја, сар со хем о Девел опростинѓа туменге ко Христос.