1 Jovanovo 1
O Slovo e Životoskoro
1Odova, so sine taro početok, so šungem, so dikhlem amare jajkhencar, so pažlivo premetingem hem so pipingem amare vastencar, kjerelape lafi baši o Slovo e Životoskoro– 2hem o životo javingjape, hem amen dikhlemle hem svedočinaja hem objavinaja tumenge o večno životo, Koj sine e Dadeja, hem javingjape amenge– 3odova, so dikhlem hem šungem, odova objavinaja hem tumenge, za da te ovel tumen hem tumenda zaedništvo amencar. A amaro zaedništvo tano e Dadeja hem Oleskere Čhaveja o Isus Hristos. 4Amen pišinaja tumenge akava, za da te ovel tumari radost pherdi.
Te dža pali svetlina
5Hem akavaj tano o haberi so šungemle Olestar hem so javinaja tumenge: o Devel tano svetlina hem ki Leste nae nisavo karanluko. 6Ako vakjeraja deka isi amen zaedništvo Oleja, a džaja ko karanluko, hovavaja hem na kjeraja o čačipe. 7Ako pak džaja ki svetlina, sar soj tano Ov korkori ki svetlina, isi amen zaedništvo jek javereja, hem o rat Oleskere Čhaveskoro o Isus Hristos očistinela amen taro sekova grevo.
8Ako vakjeraja deka nane amen grevo, hovavaja amen korkori amen, hem o čačipe nane tano ki amende. 9Ako priznajnaja amare grevia, Ovi tano verno hem pravedno: te oprostinel amare grevia hem te očistinel amen tari sekoja nepravednost. 10Ako vakjeraja deka na grešingem, Ole kjerajale hovavno, hem Oleskoro Slovo nae tano ki amende.