1 Jovanovo 2

O Hristos amaro Zastapniko

¹Mle čhavalen, akava pišinava tumenge za da ma te grešinen; hem ako nekoj grešinela isi amen Zastapniko angla ko Dat: o Isus Hristos, o Pravedniko. ²Ovi tano žrtva so pomiringja baši amare grevia; na samo amare, nego hem baši o grevia e celo svetoskere.

³Hem palo odova džanaja deka pendžarajale, ako pazinaja Oleskere zapovedia. ⁴Koj vakjerela: „Pendžaravale,“ a na pazinela Oleskere zapovedia, hovavnoj tano hem o čačipe nae tano ki leste. ⁵A koj pazinela Oleskoro Slovo, ki leste, čače, o mangipe ko Devel reslja dži ko sovršenstvo. Palo odova džanaja deka sijem ki Leste. ⁶Koj vakjerela deka ačhola ki Leste, ov trebela te džal palo odova te kjerel, sar so džala sine hem kjerela Ov.

Nevi zapoved

⁷Mangljalen, na pišinava tumenge nevi zapoved, nego i purani zapoved, so sine tumen taro početok; i purani zapoved tano o slovo, so šungenle. ⁸Ama sepak pišinava tumenge nevi zapoved; hem odovaj tano čačutno hem ki Leste hem ki tumende – soske i temnina nakhela, a i čačutni svetlina vekje svetinela.

⁹Koj vakjerela deka tano ki svetlina, a mrzinela pe phrale, ovi tano panda ko karanluko. ¹⁰Koj mangela pe phrale ačhola ki svetlina hem ki leste nae ništo so bi šaj sine nekas te čhivel ko grevo. ¹¹A koj mrzinela ple phrale ko karanluko tano hem ko karanluko džala, hem na džanela kaj džala, soske o karanluko kojrargja o jajkha leskere.

¹²Pišinava tumenge, čhavalen, soske oprostime tane tumare grevia, baši Oleskoro anav. ¹³Pišinava tumenge, dadalen, soske pendžargen Okole, Koj tano taro početok; pišinava tumenge, ternalen, soske pobedingen e bilačhe. Pišingjum tumenge, čhavalen, soske pendžargen e Dade. ¹⁴Pišingjum tumenge, dadalen, soske pendžargen Okole, Koj tano taro početok. Pišingjum tumenge, ternalen, soske sijen silna hem soske e Devleskoro Slovo ačhola ki tumende, hem soske pobedingen e bilačhe.

Ma mangen o sveto

¹⁵Ma mangen o sveto, nitu okova soj tano ko sveto. Ako nekoj mangela o sveto, o mangipa taro Devel o Dat nae tano ki leste, ¹⁶soske sa soj tano ko sveto - i pohota e teloskiri, i pohota e jajkhengiri hem o baripe e životoskoro - nae tano taro o Dat, nego taro sveto. ¹⁷A o sveto nakhela hem oleskiri pohota, a koj kjerela e Devleskiri vojlja ačhola dovek.

Baši o antihristia

¹⁸Čhavalen, o posledno saati tano; hem sar so šungen deka o antihrist avela, agjar akana uštile but antihristia; palo odova džanaja deka tano o posledno saati. ¹⁹Amendar iklile, ama na sine amendar, soske ako sine amendar, ka ačhoven sine amencar, nego trebela sine te sikavelpes deka nae tane sarine amendar.

²⁰A tumen isi tumen pomazanie taro Okova Koj tano Sveto hem džanena sa. ²¹Na pišingjum tumenge sar te phene na džanena o čačipa, nego soske džanena, hem soske nijek hovajba nae tano taro čačipe. ²²Koj tano o hovavno? Odovaj tano okova - koj na mangela te prifatinel deka o Isus tano o Hristos. Akavaj tano antihrist – koj na prifatinela e Dade hem e Čhave. ²³Sekoj koj na prifatinela e Čhave naele ni e Dade; koj priznajnela e Čhave, isile hem e Dade.

Ačhoven ko Hristos

²⁴So šungen taro početok, odova te ačhol ki tumende. Ako ačhola ki tumende okova so šungen taro početok, hem tumen ka ačhoven ko Čhavo hem ko Dat. ²⁵A akavaj tano so obečingja - Ov obečingja amenge večno životo.

²⁶Akava pišingjum tumenge baši okola, koj hovavena tumen. ²⁷A tumen, so primingen o pomazanie Olestar ačhola ki tumende, hem nae tano potrebno nekoj te sikavel tumen, nego sar so Oleskoro pomazanie sikavela tumen baši o sa, hem tano čačutno hem nae tano hovajba, hem sar so sikagja tumen, agjar ačhoven ki Leste. ²⁸Hem akana, čhavalen, ačhoven ki Leste, za da te ovel amen sigurnost hem doverba bizo te dara koga ka javinelpes Ov, hem za da ma te ladžakjera amen anglo Leste, ko Oleskoro ajbe. ²⁹Ako džanena deka Ovi tano pravedno, džanen deka sekoj koj kjerela pravda, bijamo tano Olestar.