1 Jovanovo 3

E Devleskere čhave

¹Dikhen savo mangipe dengja amen o Dat: te vakjera amen Devleskere čhave. A odova hem sijem! Odoleske o sveto na pendžarela amen, soske na pendžarge Ole. ²Mangljalen, akana sijem Devleskere čhave, hem panda na otkringjape so ka ova; ama džanaja: koga ka otkrinelpe ka ova Oleske slična, soske ka dikhale asavko savo soj tano. ³Hem sekoj koj isile akaja nadež ki Leste dikhela te očistinelpe, sar soj tano hem Ov čisto.

⁴Sekoj koj kjerela grevo, kjerela hem bezzakonie; hem o grevo tano bezzakonie. ⁵Hem džanena deka Ov javingjapes za da te otstraninel o grevia, a ki Leste nae grevo. ⁶Sekoj koj ačhola ki Leste, na grešinela; sekoj koj grešinela, na dikhljale Ole, nitu pendžargjale.

⁷Čhavalen, nikoj te na čhivel tumen ko hovajbe. Koj kjerela pravda pravednoj tano, sar soj tano Ov pravedno. ⁸Koj kjerela grevo taro beng tano, soske o beng grešinela taro početok. Odoleske javingjape e Devleskoro Čhavo, za da te pejljarel o dejlja e bengeskere.

⁹Sekoj, koj tano bijamo taro Devel na kjerela grevo, soske Oleskoro seme ačhola ki leste, hem našti te grešinel, soske tano bijamo taro Devel. ¹⁰Palo akava pendžarenapes e Devleskere čhave hem e bengeskere čhave: sekoj koj na kjerela pravda hem na mangela pe phrale, nae tano taro Devel.

Te manga amen jek jekeja

¹¹Soske akavaj tano o haberi so šungen taro početok: te manga amen jek javereja! ¹²Na sar so o Kain sine taro bilačho hem mudargja pe phrale. Hem soske mudargjale? Soske oleskere dejlja sine bilačhe, a oleskere phraleskere – pravedna. ¹³Ma čudinen tumen, phrajljalen, ako o sveto mrzinela tumen.

¹⁴Amen džanaja deka nakhlem taro meriba ko život, soske mangaja e phralen. Koj na mangela pe phrale, ov ačhola ko meriba. ¹⁵Sekoj, koj mrzinela pe phrale, tano manuš so mudarela, a džanena deka ko nijek manuš so mudarela ki peste naele večno životo.

¹⁶Palo odova pendžargem o mangipe, so Ov dengja Plo životo baši amenge; hem amen sijem dužna te da amare životia baši o phrajlja. ¹⁷A koj isile šužo životo hem o gudlipa o barvalipa e svetoskoro, a dikhela pe phrale ko nanipa, pa phandela plo srce sprema leste, sar ka ačhol e Devleskoro mangipe ki leste? ¹⁸Mle čhavalen, te na manga lafencar ili samo čhibaja, nego ko delo hem čačipe.

Uverime anglo Devel

¹⁹Palo akava ka džana deka sijem taro čačipe, pa ka uverina amen ka ova sigurna ko amare srcia anglo Leste, ²⁰soske koga amaro srce osudinela amen, o Devel tano pobaro taro amaro srce hem džanela sa.

²¹Mangljalen, ako amaro srce na osudinela amen, isi amen doverba hem sloboda te ava anglo Devel. ²²Hem so te zamolina Ole, priminaja Olestar, soske pazinaja Oleskere zapovedia hem kjeraja soj tano ugodno anglo Leste. ²³A Oleskiri zapoved tani akaja: te verujna ko anav Oleskere Čhaveste o Isus Hristos hem te manga amen jek jekeja, sar so zapovedingja amenge. ²⁴Hem koj pazinela Oleskere zapovedia ačhola ki Leste hem Ov - ki leste. Hem palo odova džanaja deka Ov ačhola ki amende: palo Duho Kas so dengja amen.