1 Jovanovo 4

Ispitinen o duhia

¹Mangljalen, ma verujnen sekole duho, nego ispitinen e duhon – dali tane taro Devel, soske but hovavne prorokja iklile ko sveto. ²Palo akava pendžaren o Duho e Devleskoro: sekova duho koj ispovedinela deka o Isus Hristos alo ko telo, taro Devel tano; ³a sekova duho koj na ispovedinela deka o Isus Hristos alo ko telo, nae tano taro Devel; odovaj tano o duho e antihristoskoro, baši kaske šungen deka avela, hem akana tano vekje ko sveto.

⁴Tumen sijen taro Devel, čhavalen, hem tumen pobedingenlen, soske tano pobaro Okova, Koj tano ki tumende, otkolku okova, koj tano ko sveto. ⁵Ola tane taro sveto, odoleske kjerena lafi svetsko hem o sveto šunelalen. ⁶Amen sijem taro Devel, koj pendžarela e Devle šunela amen amen; koj nae tano taro Devel na šunela amen. Palo odova pendžaraja o duho e čačipaskoro hem o duho e zabludakoro.

O mangipe avela taro Devel

⁷Mangljalen, te manga amen jek javereja, soske o mangipa tano taro Devel hem sekoj koj mangela taro Devel tano bijamo hem pendžarela e Devle. ⁸A koj na mangela, na pendžarela e Devle, soske o Devel tano mangipe.

⁹Ko odova otkrisalilo amenge e Devleskoro mangipe, ki amende, so o Devel bičhagja ko sveto Ple Jekebijande Čhave za da te živina preku Leste. ¹⁰O mangipe tano ko akava: na deka amen zamanglem e Devle, nego Ov zamanglja amen amen hem bičhagja Ple Čhave sar žrtva pomirnica baši amare grevia.

¹¹Mangljalen, ako o Devel zamanglja amen agjar, hem amenda trebela te manga amen jek javereja. ¹²E Devle nikoj nikogaš na dikhljale; ako mangaja amen jek javereja, o Devel ačhola ki amende hem Oleskoro mangipe ulo sovršeno ki amende. ¹³Palo odova pendžaraja deka ačhovaja ki Leste hem Ov ki amende, so dengja amen taro Plo Duho. ¹⁴Hem amen dikhlem hem svedočinaja deka o Devel o Dat bičhagja e Čhave sar Spasiteli e svetoskoro.

¹⁵Ako nekoj ispovedinela deka o Isus tano Čhavo e Devleskoro, o Devel ačhola ki leste hem ov ko Devel. ¹⁶Hem amen pendžargem hem verujngem ko mangipe, koja o Devel isile ki amende. O Devel tano mangipe: hem koj ačhola ko mangipe, ačhola ko Devel hem o Devel ačhola ki leste. ¹⁷O mangipe ki amende alo dži ko sovršenstvo ko odova: amen te ovel amen smelost ko Sudno Dive, soske savoj tano Ov, asavke sijem hem amen ko sveto.

¹⁸Ko mangipe nae dar, nego o sovršeno mangipe paldela i dar; soske i dar isila kazna; a koj darala, na alo dži ko sovršenstvo ko mangipe. ¹⁹Amen mangajale, soske prvo Ov zamanglja amen.

²⁰Ako nekoj vakjerela: „Mangava e Devle,“ a mrzinela pe phrale, hovavnoj tano; soske koj na mangela pe phrale, kas so dikhljale, našti te mangel e Devle, Kas so na dikhljale. ²¹Hem akaja zapoved isi amen Olestar: koj mangela e Devle, te mangel hem pe phrale.