1 Jovanovo 5

Pobeda upral ko sveto

¹Sekoj, koj verujnela deka o Isus tano Hristos, bijamo tano taro Devel; sekoj, koj mangela e roditele, mangela hem okole, koj tano bijamo Olestar. ²Palo odova pendžaraja deka mangaja e Devleskere čhaven, koga mangaja e Devle hem pazinaja Oleskere zapovedia. ³Soske akavaj tano o mangipe e Devleskoro, te ispolnina Oleskere zapovedia; a Oleskere zapovedia nae phare, ⁴soske sa soj tano bijamo taro Devel, pobedinela o sveto; hem akavaj tani i pobeda koja pobedingja o sveto: amari vera.

⁵Koj tano ov, koj pobedinela o sveto, ako na okova, koj verujnela deka o Isus tano e Devleskoro Čhavo? ⁶Ovi tano Okova Koj alo preku pani hem rat, o Isus Hristos; nae samo pajneja, nego pajneja hem rateja; hem o Duho tano Okova Koj svedočinela, soske o Duho tano čačipe. ⁷Soske trini tale koj svedočinena: ⁸o Duho hem o pani hem o rat, hem akala trin tane soglasna.

E Devleskoro svedoštvo baši Plo Čhavo

⁹Ako priminaja o svedoštvo e manušengoro, e Devleskoro svedoštvo tano pobaro. A akavaj tano e Devleskoro svedoštvo, deka svedočingja baši Plo Čhavo. ¹⁰Koj verujnela e Devleske ko Čhavo, isile svedoštvo ki peste; koj na verujnelale e Devle, kjergjale hovavno, soske na poverujngja ko svedoštvo, kova o Devel svedočingja baši Plo Čhavo.

¹¹Hem akavaj tano o svedoštvo: o Devel dengja amen večno životo, hem odova život tano ko Oleskoro Čhavo. ¹²Kas isile e Čhave, isile život; kas naele e Devleskere Čhave, naele život.

I delotvorno molitva

¹³Akava pišingjum tumenge, koj verujnena ko anav e Devleskere Čhaveste, za da te džanen deka isi tumen večno životo hem te verujnen ko anav e Devleskere Čhaveste. ¹⁴Hem akavaj tani i doverba koja isi amen ki Leste: deka šunela amen ako rodaja nešto pali Oleskiri vojlja. ¹⁵Hem koga džanaja deka šunela amen, so hem te molinale, džanaja deka isi amen dobimo o molbe so rodingem Olestar.

¹⁶Ako nekoj dikhela pe phrale te kjerel grevo, so na ingarela ko meriba, neka molinel, hem ka dele život, ustvari okolenge, koj na kjerena grevo so ingarela ko meriba. Isi grevo so vodinela ko meribe, baši odova grevo na vakjerava te molinen. ¹⁷Sekoja nepravda tano grevo, a isi grevo so na ingarela ko meriba.

O Čačutno Devel

¹⁸Džanaja deka nijek, koj tano bijamo taro Devel, na grešinela, nego o bijamo taro Devel pazinelape pes hem o lukavo na doprinelape uzi leste. ¹⁹Džanaja deka amen sijem taro Devel, a celo sveto tano ki vlast e lukavoske. ²⁰Isto agjar, džanaja deka e Devleskoro Čhavo alo hem dengja amen razum, za da te pendžara e Čačutne. Hem amen sijem ko Čačutno, ko Oleskoro Čhavo o Isus Hristos. Ovi tano čačutno Devel hem večno životo.

²¹Čhavalen, pazinen tumen taro idojlja. Amin!