2 Jovanovo
1Taro starešina, dži ki izbirimi gospogja hem olakere čhave, kola mangava len ko čačipe, hem na samo me, nego hem sarine, koj so pendžarge o čačipe, 2zbog o čačipe, so ačhola ki amende hem so ka ovel amencar dovek. 3I blagodat, i milost hem o mir ka oven amencar taro Devel o Dad hem taro Gospodari o Isus Hristos, o Čhavo e Dadeskoro, ko čačipe hem mangipe.
Te manga amen jek jekeja
4But radujngjum man soske maškar te čhave arakhljum asavke, koj džana ko čačipe, sar so primingem zapoved taro Dad. 5Hem akana molinava tut gospogjo, na sar te pišinava tuke nevi zapoved, nego okoja so isi amen taro početok: te manga amen jek javereja. 6A mangipe tano akava: te dža sprema Oleskere zapovedia. Odojaj tani i zapoved, sar so šungen taro početok, ki koja trebela te džan.
Pazinen tumen taro hovavne učitejlja
7Soske but hovavne iklile ko sveto, koj na priznajnena deka o Isus Hristos alo ko telo; odovaj tano o hovavno hem o antihrist. 8Pazinen tumen te na našaven okova so spečalingemle, nego te priminen celo nagrada. 9Sekoj, koj džala nadarik hem na ačhola e Hristoske ki nauka, naele e Devle. Koj ačhola e Hristoske ki nauka, ole isile hem e Dade hem e Čhave.
10Ako nekoj alo ki tumende hem na anela akaja nauka, ma priminenle ko kher hem ma pozdravinenle; 11soske koj pozdravinelale, učestvinela ko oleskere bilačhe dejlja.
12Isi man but te pišinav tumenge, ama na mangava lileja hem mastiloja, nego nadinava man deka ka avav tumenge hem direktno muj mujeja te kjerav lafi tumencar, za da te ovel amari radost pherdi. 13Pozdravinena tut o čhave tari ti izbirimi phen. Amin!