Sar valjani te oven o romnja hem o roma

¹Agjar hem tumenda, o džuvlja, oven pokorna tumare romenge, hem ako nesave roma na pokorinenape e Slovoske, te oven pridobime bizo lafia, e šukar ponašajeja taro lengere romnja, ²koga ka dikhen sari tumaro ponašaj pherdo sajgijaja ki dar hem ki čistota.

³Tumaro doteriba te na ovel avrijaldan: ko pletiba o bala, ko čhiba zlato ili ko urajba razna šeja, ⁴nego: andre ko manuš ko srce, ko doteriba so na preperela, e krotko hem e mirno duhoja, soj tano baro vrednost anglo Devel. ⁵Soske agjar nekogaš doterinenape sine o sveta džuvlja, kola so nadinenapes sine ko Devel hem pokorinenape sine pe romenge, ⁶sar so sine i Sara poslušno e Avraameske, hem vikinelale sine gospodar: tumen sijen lakere čhaja ako kjerena šukar, taro ništo ma daran.

⁷Agjar hem tumenda, o roma, živinen šukar te hajljoven tumen tumare romnencar sar poslabo čaro, sikaven olenge sajgija soske olada ka nasledinen tari blagodat e životoskiri, za da te oven tumare molitve bizo prečka.

Te ciden tumen taro bilačhipe

⁸Najposle, oven sarine složna ko ista misle, te ovel tumen šukar oset jek jekeske, mangipe phralikano, milostiva, ponizna. ⁹Ma iranen bilačhipa bilačhipaske, ili navreda navredake, nego naprotiv, blagoslovinen, soske vikime sijen odoleske, za da te nasledinen blagoslov. ¹⁰Soske:

Cidena baši pravda

¹³Ako džana palo šukaripe, koj ka kjerel tumenge bilačhipe? ¹⁴A ako hem da cidena baši pravda, oven blagoslovime! ‘Ma daran, nitu ma čhiven tumenge nemir taro olengere zakane,’ ¹⁵nego poštojnenle hem kjerenle sveto ko tumare srcia e Hristo sar Gospodari, sekogaš oven spremna baši te odgovorinen sekaske koj so mangela te džanel, te objasninen soske hem savi tani tumari nada, koja tani ki tumende, ama krotkipaja hem dar sajgijaja. ¹⁶Te ovel tumen čisto sovest, hem okola koj uvredinena tumen baši tumaro šukar ponašaj so živinena ko Hristos, te ladžan baši odova baši so kjerena to lafi bilačhe. ¹⁷Soske tano pošukar, ako e Devleskiri vojlja mangela, te ciden kjeribaja šukar otkolku te ciden kjeribaja bilačhe.

¹⁸Soske hem o Hristos jek puti pretrpingja baši o grevia, Pravedno baši e nepravednonge, za da te ingarel amen ko Devel; čače, Ov, Koj sine mudardo ko telo, a ko Duho ulo dživdo. ¹⁹E Duhoja Ov gelo togaš, hem objavingja e duhonge soj tane ko phanlipa, ²⁰kola nekogaš na šunena sine e Devle, koga e Devleskoro trpenie udžarelalen sine e Noeske ko vreme dži kote kjerelape sine o kovčeg, kote samo hari olendar, ustvari ovto duše, spasingepe preku pani.

²¹Ki adaja slika sikavela amenge o krštevanje, koleja akana sijen spasime. O krštevanje nae tano te cidele tutar o melalipa taro to telo, nego tano zavet anglo Devel so delape čisto sovesteja. Odova akana šaj te ovel, soske o Isus Hristos voskresningja, ²²Koj tano desno taro Devel, otkoga gelo ko nebo, kote pokorinenape Leske o angejlja, hem o vlastia, hem o sile.