1 Timotej 3
Sar valjani te oven o vodačia
1Točnoj tano deka koga nekoj mangela te ovel vodači ki crkva, mangela but šukar buti. 2Sprema odova, o vodači trebela te ovel: bizo mahana so isile bilačhe navike, rom jeke romnaja, te džanel te kontrolirinelpe, gogjaver, šukar ugled te ovele, gostoljublivo, sposobno baši te sikavel; 3na pijandžija, nitu te na kjerel sa silaja, na samo te mislinel baši o pare, nego krotko, te na ovel te rasprajnelpe, hem te na ovel alčno, 4koj upravinela šukar ple khereja hem oleskere čhave šunenale hem poštojnenale, 5soske ako na džanela te upravinel ple khereja, sar ka grižinelpes baši e Devleskiri crkva?
6Te na ovel nevo obratimo, za da ma te vazdelpe ko baro hem te perel ki osuda e bengeskiri! 7A trebela te ovele šukar ugled maškar okola manuša soj tane avrijal, za da ma te perel ki stapica e bengeskiri hem te ladžakjerelpes.
Sar valjani te oven okola koj služinena ki crkva
8Isto agjar, okola koj služinena ki crkva trebela te oven poštena, na dujmujale, te na mangen but mol, na alčna baši melale pare, 9koj pazinena i tajna e verakiri čisto sovesteja. 10Hem ola prvo te oven ispitime, hem posle te kjeren i služba ako tane bizo bilačhe mahane.
11Isto agjar o romnja lengere trebela te oven poštena, te na kjeren nekaskoro lafi bilačhe; te džanel te kontrolirinelpe, hem verna ko sa.
12Okola koj služinena ki crkva te oven roma jeke romnakere, koj upravinena šukar ple čhavencar hem ple kherencar; 13ustvari okola, koj kjerena šukar pli služba dobinena šukar ugled baši peske hem možnost te kjeren slobodno lafi baši pli vera ko Hristos Isus.
Bari tani i tajna e devlipaskiri
14Akava pišinava tuke, nadinava man deka skoro ka avav ki tute; 15ama slučajno te zabajngjum man, te džane sar te ponašine tut e Devleske ko kher, koj tani crkva e dživde Devleskiri, stubo hem temeli e čačipaskoro.
16Hem bizo sumna, bari tani i tajna e devlipaskiri:
Okova, Koj javingjape ko telo,
sine opravdimo ko Duho,
sikagjapes e angelenge,
sine najavimo maškar o narodia,
poverujngele ko sveto,
sine voznesimo ki slava.