1 Timotej 4

Hovavno učenje

¹A o Duho jasno vakjerela deka ko poadari vremia nekoj ka cidelpe tari vera hem ka šunen hovavne duhia hem bengano učenje, ²preku licemerstvo e hovavnengoro, koj tane žigojme ki pli sovest, ³koj zabraninena te stapinelpe ko brako hem rodena te vozdržine tut taro hajbe, so o Devel sozdajngja za da te len so blagodarnost o verna, koj pendžarena o čačipe.

⁴Soske sekova Devleskoro sozdanie tano šukar, hem ništo na trebela te ovel otfrlimo, ako priminelapes so blagodarnost, ⁵soske osvetinelape preku e Devleskoro slovo hem molitva.

Ov lenge primer

⁶Ako sovetineja ko akava e phralen, ka ove šukar služiteli e Hrista Isuseskoro, koj hraninelape taro lafia e verakere, hem tari šukar nauka, so sledinejala.

⁷A izbegin taro nečista hem babina paramisa! Nego obučin tut ko devlipa! ⁸Soske e teloskiri obuka tani hari pokorisno, a o devlipa tano pokorisno baši o sa, soske isi vetuvanje baši o avdisutno hem idno životo. ⁹Odovaj tano o čačikano slovo hem dostojno baši pherdo primiba.

¹⁰Ustvari, odoleske amen trudinaja amen hem borinaja amen, soske nadinaja amen ko dživdo Devel, Koj tano Spasiteli sa e manušenge, pogotovo e vernonge. ¹¹Ko asavke bukja trebela te zapovedine hem te sikavelen e manušen!

¹²Nikoj te na prezirinel tut baši tlo ternipe! Nego, ov lenge primer e vernonge ko slovo, ko ponašaj, ko mangipe, ki vera, ki čistota! ¹³Dži kote avava pazin ko čitiba, baši opomeniba hem o poučuvanje!

¹⁴Ma zanemarin i darba kojaj tani ki tute, kojaj tuke dendi preku proroštvo hem vas čhivdo taro starešine. ¹⁵Ispolnin odova, ov ko odova hem tlo so napredujneja te ovel lenge vidlivo sarinenge! ¹⁶Pazin tut hem o učenje! Trpin ko odova, soske kjeribaja akava ka spasine hem tut hem okolen koj šunena tut.