1 Timotej 5
Sajdin sarinen
1Ma akoš tut oštro pophure manušeja, nego opomeninle sar dadeske, e poternen sar phrajlja, 2o pophure džuvlja sar daja, o poterne sar phejna sekole čistotaja.
Sajdin e udovicen
3Poštojn e udovicen, koj tane čačikane udovice. 4Ako nekoja udovica isila čhave ili unukja, ola neka siklon prvo te sikaven pobožnost ki pli familija, hem te iranen ple roditelenge, soske odovaj tano šukar hem ugodno anglo Devel.
5A koja tani čačikani udovica hem ačhili korkori, oj čhigja pli nadež ko Devel hem tani postojano dive i rat ko rodiba hem molitve. 6A okoja koj živinela baši zadovolstvia dživdi tani muli.
7Prenesin hem akava: te oven neporočna. 8Ako nekoj na grižinelapes baši plenge, pogotovo baši o kherutne, odrekujngjape tari vera hem tano pobilačho taro okova koj na verujnela.
9E udovicenge ko spisako te pišinelpe asavki udovica, koja nae tani poterni taro šovardeš berš, koja sine romni jeke romeskiri, 10kova isila svedoštvo baši šukar dejlja; ako dikhlja e čhaven, ako sine gostoljublivo, ako thogja o pre e svetiengere, ako pomožingja e cidimenge; hem ako džala sine palo sekova šukar delo.
11A poterne udovice ma primin, soske koga ka cidenlen o telesna strastia sprotivno taro Hrista, mangena te ženinenpe, 12soleja cidena upri peste osuda, soske otstapinge taro prvo vetuvanje. 13A osven odova, soskej tane bizi buti, siklovena te džan ko khera. Hem na samo bizi buti, nego hem tale lafčike hem sa mangena te džanen, hem kjerena lafi so na trebela.
14Hem agjar, mangava o terne udovice te ženinenpes, te bijanen čhaven, te vodinen domakinluko, za da ma te den e protivnikoske nisavo muj baši te hulinel. 15Ustvari, nekoj vekje zaostraninge hem cidinge palo satana.
16Ako nekoj verno ili verna isi udovice, neka pomožinenlen, hem neka ma te ovel opteretimi i crkva, za da te šaj te pomožinel okolenge koj tane čače udovice.
Sajdin e starešinen
17E starešinenge, koj kjerena šukar pli buti, trebela te sikavelpe lenge duplo sajgija, posebno okolenge koj trudinenape ko slovo hem poučinena. 18Soske o Sveto Pismo vakjerela: ‘Ma phan o muj e guruveskoro so kjerela giv,’ hem ‘o rabotniko zaslužinela pli plata.’
19Ma primin koga nekoj vakjerela protiv o starešine, osven pali izjava taro duj ili trin džene svedokja. 20Okola koj grešinena koš tut lencar anglo sarine, za da te ovel e javerenda dar.
Pazin pred te sudine hem te kjere nešto
21Hem zadolžinava tut anglo Devel, hem anglo Hristos Isus, hem anglo izbirime angejlja, te pazinele akava bizo pred te sudine hem te kjere nešto te deline sar ka avel tuke.
22Ma čhiv te vasta presigate nikaske, ma le delo ko tugja grevia! Pazintu čisto tut!
23Ma pi više samo pani, nego le pohari hem mol, baši tlo želudniko hem često nasvalipa.
24O grevia nekaskere manušengere dikhjona hem džana ko sudo angleder olende, a nekoj džana palo lende. 25Isto agjar hem o šukar dejlja dikhjona, a hem koj nae tane, našti te garavenpes.