1 Timotej 6

Sajgijaja služin

¹O robia, koj tane telo jarem, te računinen ple gospodaren dostojna baši sekoja sajgija, za da ma te hulinelpes e Devleskoro anav hem i nauka. ²A okola koj isilen verna gospodajra, te na prezirinenlen, soske tane phrajlja, nego te služinen lenge pošukar, soske okola koj isilen pomoš taro lengere usluge tane verna hem mangle phrajlja! Agjar poučin hem propovedin!

O devlipa nae tano sredstvo baši te pečaline

³Ako nekoj poučinela pojaver hem na sledinela o saste lafia amare Gospodareskere o Isus Hristos hem i nauka taro devlipa, ⁴ovi tano ko baro hem na džanela ništo, nego nasvalo tari želba baši te pučljarelpe hem prepirke taro koj ikljona: o zavist, raspravie, hulenje, bilačhe sumne, ⁵čuče prepirke maškar o manuša irame gogjaja hem otstranime taro čačipe, koj mislinena deka o devlipa tano sredstvo baši te pečaline.

Te ova zadovolno odoleja so isi amen

⁶O devlipa hem tano bari pečalba koga tano zaedno e čustvoja taro zadovolstvo. ⁷Soske ništo na angem ko akava sveto, nitu šaj te ingara nešto. ⁸A koga isi amen hajbaske hem šeja, te ova zadovolno odoleja!

⁹A okola koj mangena te barvaljoven, perena ko iskušenie, ki stapica hem ko but bigogjakere hem štetna želbe, so gurinena e manušen ko propast hem uništiba, ¹⁰soske o alčnost tano koreno baši o sekova bilačhipe; nekoj predajngepes leske, otstraningepes tari vera hem posagepes pes bute dukhencar.

Pazin i zapoved čisto

¹¹A tu, devlikano manuš, naš taro sa odova! Hem dža palo ko pravednost, devlipa, vera, mangipe, trpelivost, krotkost! ¹²Borin tut ki šukar borba e verakiri, grabin o večno životo, baši kova sijan povikujmo, hem baši kaske dengjan šukar ispovedingjan tut anglo but svedokja.

¹³Zapovedinava tuke anglo Devel, Koj oživinela sa hem anglo Hristos Isus, Koj anglo Pontij Pilat posvedočingja i šukar ispoved, ¹⁴te pazinela i zapoved čisto hem neporočno dži ko javiba amare Gospodareskoro o Isus Hristos, ¹⁵kova – ko plo vreme, ka otkrinel o blaženo hem edinstveno Vladeteli, o Caro upreder o cajra hem Gospodari upreder o gospodajra; ¹⁶Koj jedino bizo meriba, živibaja kote nae nikas pristap ki svetlina, Kas so nikoj taro manuša na dikhljale nitu šaj te dikhele, Oleske čest hem večno sila. Amin!

Zapoved e barvalenge

¹⁷Zapovedin e barvalenge ko akava sveto te na oven ko baro hem te na nadinenpes ko barvalipe kote šaj te našavenle, nego ko dživdo Devel Koj dela amen izobilno sa baši te uživina, ¹⁸te kjeren šukar, te oven barvale ko šukar dejlja, te oven darežliva hem rešime te delinen e javere manušencar odova so isilen; ¹⁹te kheden baši peske gudlipa sar osnova baši idnina, te grabinen o čačikano životo.

Pazin i vera

²⁰O Timotej, pazin odova soj tuke tano doverimo, hem otstranin taro nečista hem čuče muabetia hem o protiviba baši o hovavno vakjerdo pendžariba, ²¹baši kova nekoj ikjerenapes hem agjar cidingepes tari vera. I blagodat tuja. Amin!