2 Timotej 3

Ka oven phare vremia

¹A akava džan: ko posledna dive ka oven phare vremia, ²soske o manuša ka oven sebična, srebroljubitejlja, korkori te falinenpe, gordeliva, hulitejlja; nepokorna e roditelenge, neblagodarna, bizo svetost; ³bizo prirodno mangipe, na mangena te smirinenpe, lena ki men, naelen kontrola, diva, dušmajna e šukaripaske, ⁴predavnikja, izbuvliva, vazdime, poviše dikhena te uživinen ke ple strastia, a na te mangen e Devle, ⁵koj isilen izgled devlikano, a odrekujngepe tari oleskiri sila; cide tut hem olendar!

⁶Soske olendar tane okola koj čhivenapes ko khera hem hovavena e prosta džuvlen natovarime grevoncar, koj tane vodime taro različna strastia, ⁷koj sikljovena sekogaš, a nikogaš našti te aven dži ko pendžaribe o čačipe.

⁸Hem sar so o Janij hem o Jamvrij sprotivstavingepes e Mojseske, agjar hem akala protivinenapes e čačipaske, manuša irame gogjaja, prepele tari vera. ⁹Ama nae te napredujnen vekje, soske olengoro delinipa ka otkrinelpes anglo sarine, sar so otkringjapes hem okole dujengoro.

Ačhov ko odova so sikliljanle

¹⁰A tu sledineja sine mlo učenje, o način e živibaskoro, i zamisla, i vera, o dolgotrpenie, o mangipe, o trpenie, ¹¹o goniba, o cidiba so ulo mange ki Antiohija, Ikonija hem Listra. Save progonstvia pretrpingjum, hem o Gospodari izbavingja man taro sa! ¹²A hem sarine koj mangena te živinen devlikano ko Hristos Isus, ka oven progonime, ¹³dži kote o bilačhe manuša hem o izmamnikja ka napredinen ko bilačhipe, te hovaven hem ka oven hovavde.

¹⁴A tu ačhov ko odova so sikliljanle hem ko so sijan ubedimo, soske džaneja kastar sikliljanle hem ¹⁵soske taro tlo tiknipa pendžareja o Sveta Pismia, koj šaj te kjeren tut mudro baši spasenie preku i vera ko Hristos Isus. ¹⁶Celo Sveto Pismo tano taro Devel vdahnujmo hem tano korisno baši sikljojba, baši te hajljova kote amare greške, baši popraviba hem baši vospitiba ki pravda, ¹⁷za da te ovel e Devleskoro manuš sovršeno spremimo baši sekova šukar delo.