2 Timotej 4

Propovedin o Slovo

¹Zadolžinava tut anglo Devel hem o Hristos Isus, Koj tano gotovo te sudinel e dživdenge hem e mulenge, Oleskere javibaja hem Oleskere Carstvoja; ²propovedin o slovo, nastojn ko vreme hem ko nevreme, vakjer kote grešinena, vikin lenge, ohrabrin sa te strpleneja hem sikljojbaja.

³Soske ka avel vreme, koga o manuša na ka trpinen i sasti nauka, nego spored ple strastia ka kheden peske učitejlja, baši te ovel olengere kanenge šukar, ⁴hem ka iranen ple kana taro čačipe, a ka iranenpes ko paramisa.

⁵A tu ov trezveno ko sa, trpin o cidibe, izvršin i buti evangelisti, ispolnin tli služba dži ko krajo. ⁶Soske me vekje čhorgjovava sar žrtva, hem o vreme mle džajbaskoro alo. ⁷Margjum man šukar borba, završingjum o prastajbe, zapazingjum i vera. ⁸Otakana poadari spremimoj tano mo venco e pravdakoro, so ka dele mange ko odova Dive o Gospodari, o Pravedno Sudija, hem na samo mange, nego hem sarinenge, koj zamangle Oleskoro javiba.

O Gospodari dengja man sila

⁹Pogrižin tut te ave skoro ki mande, ¹⁰soske o Dimas mukljama, soske zamanglja o avdisutno sveto hem gelo ko Solun; o Kriskent gelo ki Galatija, o Tit ki Dalmacija. ¹¹Samo o Luka tano uza mande. Le e Marko hem anale tuja, soske mange tano korisno baši služba. ¹²E Tihike bičhagjumle ko Efes. ¹³Koga ka ave, ana i nametka, so mukljumla ki Troada uzi karpa, hem o lila, pogotovo o pergamentia!

¹⁴O Kovači o Aleksandar kjergja mange but bilačhipe; o Gospodari ka platinel leske spored oleskere dejlja. ¹⁵Hem tuda pazin tut olestar, soske protivisalilo but baši amare lafia.

¹⁶Ki mri prvo odbrana nikoj na sine mancar, nego sarine mukle man; neka ma te računinelpes lenge odova! ¹⁷Ama o Gospodari ačhilo mancar, hem dengja man sila, za da te ispolninelpes o propovediba preku mande, hem te šunen sa o narodia; hem izbavingjum man taro e laveskoro muj. ¹⁸O Gospodari ka izbavinel man taro sekova bilačho delo hem ka zapazinel man baši Plo Nebesno Carstvo. Oleske slava baši večna vejkja. Amin!

¹⁹Pozdravin e Priskila hem e Akila hem Onisiforeskoro kher! ²⁰O Erast ačhilo ko Korint, a o Trofim mukljumle nasvalo ko Milet. ²¹Pogrižin tut te ave angleder o jeven! Pozdravinena tut o Euvul, o Pud, o Lin, i Klaudija, hem sa o phrajlja.

²²O Gospodari o Isus Hristos te ovel tle duhoja! I blagodat te ovel tumencar. Amin!