Tit 1

Pozdrav

¹O Pavle, e Devleskoro sluga hem apostoli e Isuse Hristoskoro, spored i vera taro e Devleskere izbirime hem o pendžariba e čačipaskoro, koja tano spored o devlipa, ²ki nadež baši večno životo, so angleder o večna vremia vetingja o Devel, Koj na hovavela, ³a ko plo vreme javingja Plo Slovo preku propoved, soj mange tano doverimo mange spored i zapoved e Devleskiri, amaro Spasiteli – ⁴dži ko Tit, o čačikano čedo, e zaedničko verakoro: i blagodat, o milost hem o mir taro Devel o Dat hem o Gospodari o Isus Hristos, amaro Spasiteli.

Sar valjani te oven o starešine

⁵Odoleske mukljum tut ko Krit, za da te sredine okova so nae tano dovršimo hem baši te čhive starešine ko sa o diza, sar so naredujngjum tuke; ⁶ako tano nekoj neporočno, rom jeke romnakoro, ako isile čhave koj verujnena, koj nae tane obvinime baši rumime bukja ili nepokornost; ⁷soske okova soj odgovorno sar Devleskoro kher so vodinela trebela te ovel neporočno: na samo pes te dikhel, na holjamo, na pijandžija, na tepači, na alčno baši nečesno te zaradinel, ⁸nego gostoljublivo, amal e šukaripaske, gogjaver, pravedno, sveto, vozdržinelape, ⁹koj ikjerelapes cvrsto baši o verno slovo, soglasno e naukaja, za da te šaj hem te opomeninel ki sasti nauka hem te vakjerel olengere greške okolenge koj protivinenapes.

Isi but so kjerena lafi ko čučo hem hovavne

¹⁰Ustvari, isi but nepokorna, hem so kjerena lafi ko čučo hem hovavne, pogotovo taro obrezime, ¹¹kaskere trebela te phandenpes o muja lengere, soske ola baši nečesno te zaradinen rasturinena cela khera, sikavenalen odova so na trebela. ¹²Jek olendar, olengoro sopstveno proroko, isile vakjerdo: ‘O Kritjajna tale sekogaš hovavne, bilačhe dzvejra, mrzliva hem mangena previše te han!’

¹³Akava svedoštvo tano čačikano; odoleske akoš tut lencar oštro, za da te oven saste ki vera, ¹⁴za da te na den vnimanie e judejsko paramisenge hem o zapovedia e manušengere koj iranenapes taro čačipe.

¹⁵Baši o čista saj tano čisto; a baši okola koj tane nečista hem koj na verujnena, ništo nae tano čisto, nego melale tane olengoro o razum hem i sovest. ¹⁶Ispovedinena deka pendžarena e Devle, ama odrečinenapes e deloncar, sar odvratna hem neposlušna hem nesposobna baši savo hem te ovel šukar delo.