Efesjajna 2
Pali blagodat sijen spasime
1Hem tumenda, koj sijen sine mule baši tumare prestapia hem grevia, 2ko kova živinena sine nekogaš sar o javera narodo sar so živinena ko sveto, sprema o vladeteli e vozdušno silengoro – o duho, koj kjerela buti akana maškar o čhave so na mangena te šunen e Devle. 3Maškar akala, hem amenda živingem nekogaš ko amare strastia e teloskere, kjeraja sine o bukja so mangela amaro telo hem o misle hem sijem sine ki priroda čhave e holjakere sar hem o sa javera.
4Ama o Devel, Koj tano barvalo milosteja, taro Plo baro mangipe koleja zamanglja amen, 5dživde kjergja amen zaedno e Hristoja hem amen, koj sijem sine mule baši amare grevia – pali blagodat sijen spasime! – 6hem Oleja voskresningja amen hem Oleja bešakjergja amen ko nebesna thana, ko Hristos Isus, 7ta ko idna vekja te sikavel o prebaro barvalipe tari Pli blagodat, sprema Plo šukaripa ki amende ko Hristos Isus.
8Soske pali blagodat sijen spasime, preku vera, hem odova nae tano tumendar korkori – odovaj tano e Devlestar poklon! 9Nae taro dejlja, za da te na falinelpe nekoj. 10Soske, Leskoro delo sijem, sozdajme ko Hristos Isus, baši šukar dejlja, kola o Devel spremingjalen angleder, za da te živina ki lende.
Ovi tano amaro mir
11Odoleske ma bistren so sijen sine poangle. Tumen sprema o bijaniba na sijen Evrea. A okola soj tane obrezime, iako tano odova samo telesno obreziba hem kjerdo taro manušikano vas, but tele dikhena sine tumen hem vakjerena tumen „o biobrezime“. 12Odova sine koga na sine tumen o Hristos. Sijen sine jabandžie, hem na sijen sine delo taro e Devleskoro narodo. Na sine tumen delo ko zavet, ko vetuvanje so o Devel dengjalen Pe narodoske. Živinena sine ko akava sveto bizo nadež hem bizo Devel. 13A akana ko Hristos Isus, tumen koj nekogaš sijen sine dur, ulen paše preku e Hristoskoro rat.
14O Hristos tano Odova so smiringja amen, Koj taro Evrea hem so nae Evrea kjergja jek narodo. Pejljargjale o dzido so delinela amen sine hem kjerela amen sine dušmajna. 15Ple meribaja o Hristos čhigja krajo baši o celo evrejsko sistemi taro zapovedia hem pravila. Preku Peste o Hristos kjerela nevo manuš, hem taro Evrei hem taro so nae Evrei, hem agjar kjerela mir. 16Meribaja ko krsto, hem baši o Evrea hem baši okola so nae Evrea, o Hristos uništingja o dušmanluko so vladinela sine maškar lende, smiringjalen e Devleja, khedingjalen ko jek narodo.
17Ov alo te propovedinel mir tumenge, koj sijen sine dur hem mir okolenge, koj sine paše: 18soske preku Leste, hem akala hem o javera, isi amen pristap ko Dat ko jek Duho.
O Hristos amaro agolno bar
19Odoleske, tumen na sijen vekje jabandžie hem strancia, nego sijen e svetiencar e Devleskoro narodo hem o kherutne e Devleskere, 20gradime upro temeli e apostolengoro hem e prorokongoro, a o agolno bar tano korkori o Hristos Isus. 21Upri Leste celo sostajmi gradba bajrola ko sveto hrami ko Gospodari, 22upri Kaste hem tumenda ko Duho zaedno gradinena tumen ko e Devleskoro bešiba.