Efesjajna 3
I tajna e Hristoskiri
1Odoleske me, o Pavle, sijum zatvorniko e Hrista Isuseskoro baši tumenge e narodonge so na sijen Evrea. 2Sigurno šungen, baši i zadača koja mange tani dendi taro Devel, baši Oleskiri blagodat te propovedinavla tumenge so na sijen Evrea; 3deka o Devel otkringja hem vakjergja mange i tajna, sar so poangle ko kratko pišingjum tumenge. 4Čitibaja othar šaj te hajloven so isi man ki godi so mangava te vakjerav baši i tajna e Hristoskiri, 5koja so ko javera pokolenia na sine lenge phendi e manušikane čhavenge, sar so akana preku o Duho tani otkrimi Oleskere sveta apostolenge hem prorokonge.
6I tajna ikjerelape ko odova deka okola so nae Evrea ule naslednikja e Evreencar, pripadinena isto teloske, hem deka učestvinena ko vetuvanje kova o Devel ispolningjale ko Hristos Isus preku o Evangelie, 7baši kaske uljum služiteli, sprema o dari tari e Devleskiri blagodat, koja tani mange dendi sprema tari Oleskiri sila so delujnela.
8Mange – o najtikno taro sa o sveta – dendi tani mange akaja blagodat: te vakjerav e narodonge baši e Hristoskoro barvalipa kozomi tano baro so naele krajo, našti te opišinelpe, 9hem sarinenge te rasvetlinav soj e Devleskoro plani, kova tari večnost sine tajna garavdi ko Devel – o Sozdateli baši o sa; 10za da te otkrinelpe e Devleskiri mudrost so isila but strane, akana preku i crkva baši o načalstvia hem o vlastia ko nebesna thana, 11sprema Pli večno namera, koja kjergjala ko Hristos Isus, amaro Gospodari, 12ki Kaste isi amen sigurnost bizo dar te ava ko Devel, pherde doverbaja – preku i vera ki Leste. 13Odoleske molinava tumen, te na čhingjoven hem te na našaven tumari nada baši mle nevolje, so arakhle man baši tumenge: olaj tumari slava.
E Hristoskoro mangipa nakhavela o džandipa
14Baši odova perava ko kočaka anglo o Dat amare Gospodareskoro o Isus Hristos, 15Kastar sekova rodo ki nebesa hem ki phuv dobinela anav; 16te del tumen, sprema o barvalipa tari Pli slava – te zojrakjerel tumen andraldan ki tumende e silaja preku Oleskoro Duho, 17ta preku i vera te živinel o Hristos ko tumare srcia: te oven vkorenime hem temelime ko mangipe; 18za da te šaj te svatinen sa e svetiencar, soj tano širina hem dužina, hem učipa hem hor, 19hem te pendžaren e Hristoskoro mangipa, kova nakhavela o džandipa: za da te phergjoven tumen celosno e Devleske ki polnota.
20A Okoleske, Koj Ple silaja, so delujnela ki amende, šaj te kjerel but poviše upreder o sa so amen molinaja ili mislinaja, 21Oleske nekaj tano slava ki crkva hem ko Hristos Isus ko sa o pokolenia taro vekja ko vekja! Amin!