O Hristos tano o Šero

¹Odoleske molinava tumen, me zatvorniko ko Gospodari, te živinen dostojno spored o povik ko kova sijen povikujme: ²sekole poniznosteja hem krotkost, trpenie, podnesinen tumen jek jekeja ko mangipa! ³Dikhen te arakhen o jekipe e Duhoskoro ki vrska e mireja.

⁴Jek telo hem jek duho, sar so sijen hem tumen povikujme ki jek nadež ko tumaro povik; ⁵jek Gospodari, jek vera hem jek krštevanje; ⁶jek Devel hem Dat sarinengoro, Koj tano upreder o sarine, hem preku sarine hem ko sarine.

⁷A sekaske amendar dendi tani i blagodat spored i merka taro e Hristoskoro dari. ⁸Odoleske vakjerelape:

⁹A „vazdisalilo“ – so značinela, javer nego hulilo ko telune thana tari phuv? ¹⁰Ov Koj hulingja, odovaj tano Okova isto, Koj vazdisalilo upreder o sa o nebesia, za da te pherel sa.

¹¹Xem Ov dengja jek baši apostojlja, o javera baši prorokja; jek baši evangelistia, a javera baši pastijra hem učitejlja, ¹²za da te usovršinenpes o svetie baši o delo e službakoro, baši te gradinelpes e Hristoskoro Telo, ¹³dži kote sarine na avaja dži ko jekipe e verakoro hem ko pendžariba e Devleskere Čhave, dži ko sovršeno manuš, dži ki pherdi merka e Hristoskere baripaste, ¹⁴za da ma te ova vekje čhave, koj nišinelalen hem ingarelalen sekoja bavlal e naukakiri, soleja – o manušikano hovajba hem lukavstvo – anela dži ko džande izmislime zablude.

¹⁵Nego, vakjerindor o čačipe mangipaja, amen trebela te bajrova ko sa – ki Leste, Koj tano Šero, o Hristos. ¹⁶Olestar celo Telo tano povrzimo hem soedinimo ko jek, ko odova način so sekova delo dela potkrepa spored jek merka ko sekova odelimo delo; odova kjerela o Telo te bajrol baši pli sopstveno nagradba ko mangipa.

Neve manuša ko Hristos

¹⁷Akava vakjerava hem svedočinava ko Gospodari, te na živinen vekje sar so džana o narodia ki sueta ple gogjakiri, ¹⁸karanluko isi ki lengiri godi, dujrarde taro e Devleskoro životo, baši o bidžandipe kova vladinela ki lende, soske zorale korakoro tano olengoro srce. ¹⁹Otkoga našagele o čustvo, ola hem predajngepe pes ko rumime bukja, za da te kjeren razna melalipa e alčnosteja.

²⁰A tumen na pendžargenle agjar e Hrista, ²¹ako šungen baši Oleske hem ako sijen ki Leste poučime agjar, sar soj tano o čačipe ko Isus; ²²ko odnos taro tumaro anglutno životo, tumen trebela te huljaven tumendar o purano manuš, koj rumingjovela baši o hovavne strasna želbe, ²³hem te obnovinen tumen ko duho tari tumari godi, ²⁴hem te uraven tumen ko nevo manuš, koj tano sozdajmo spored o Devel ki pravda hem svetost e čačipaskoro.

²⁵Odoleske otfrlinen o hovajba hem ‘vakjeren o čačipa sekoj ple pašeja,’ soske sijem členia jek jekeja! ²⁶‘Ako sijen holjame, ma grešinen!’ O kham te na zajdinel ki tumari holi, ²⁷hem ma den than e bengeske!

²⁸Koj čorgja, te na čorel vekje! Pošukar tano te trudinelpes hem te kjerel buti ple vastencar odova soj tano šukar, za da te šaj te del okoleske, kas isi potreba!

²⁹Nisavo bilačho lafi te na ikljol taro tumaro muj, nego samo šukar lafi, baši te izgradinen tumen – kote tano potrebno, za da te del blagodat e slušatelenge.

³⁰Hem ma žalostinen o Sveti Duh Devleskoro, Koleja sijen zapečatime baši o dive e izbavibaskoro!

³¹Sekova kjerkipa, hem holi, hem holjaniba, hem vikiba hem huliba, te oven otstranime tumendar, sekole bilačhipaja. ³²Oven jek jekeske šukar, milostiva, oprostinen tumen jek jekeja, sar so hem o Devel oprostingja tumenge ko Hristos.