Živinen mangipaja

¹Hem agjar, len primer taro Devel hem odova kjeren, soske tumen sijen e Devleskere mangle čhave, ²hem živinen mangipaja, sar so hem o Hristos zamanglja amen hem predajngjape Pes baši amenge, sar dendi žrtva soj tano šužo hem ugodno miris e Devleske.

³A o bludstvo hem sekova gadna melalipa, ili okova so mangela te dikhel ko korist samo peske, te na spomninelpes maškar tumende, sar so bešela e sveta manušenge. ⁴Nitu bezobrazna hem čuče lafia, nitu smeške, soj nae tane šukar vakjeribaske, nego pošukar te blagodarina e Devleske. ⁵Soske, džanen akava šukar: nijek bludniko, nijek melale bukja so kjerela, nijek okova so mangela te dikhel ko korist samo peske – koj tano idolopokloniko – naelen nasledstvo e Hristoske hem e Devleske ko Carstvo!

⁶Nikoj te na hovavel tumen čuče lafencar, soske baši asavke bukenge avela e Devleskiri holi upro okola čhave so na šunena e Devle. ⁷Hem agjar, ma čhiven tumen asavkencar asavke melale bukja te kjeren!

Čhave e svetlinakere

⁸Soske nekogaš sijen sine karanluko, ama akana sijen svetlina ko Gospodari: živinen sar čhave e svetlinakere. ⁹A o Duho dela plodi so ikjerelape ko sekova šukaripa, ko pravednost, hem ko čačipa!

¹⁰Ispitinen soj tano ugodno e Gospodareske, ¹¹hem ma čhiven tumen te kjeren asavke bizoplodna dejlja soj tane e karanlukoskere, nego pošukar: otkrinenlen! ¹²Soske tano ladžavo te kjerelpe lafi hem baši odova so ola kjerenale garavutno. ¹³Ama i svetlina ka otkrinelen hem sa ka ikljol ki videlina, soske sa soj tano ikavdo ki svetlina, dikhjolape. ¹⁴Odoleske vakjerelape:

¹⁵Hem agjar pazinen šukar, sar živinena! Na sar bigogjakere, nego sar mudra. ¹⁶Iskoristinenle o vreme, soske o dive tane bilačhe. ¹⁷Odoleske ma oven bigogjakere, nego hajljoven soj tani e Devleskiri vojlja! ¹⁸Hem ma makjoven moljaja, ko kovaj tane o rumime bukja, nego pheren tumen e Duhoja!

¹⁹Kjeren lafi maškar tumende jek jekeja psalmencar, himnencar, hem duhovna gilencar! Giljaven e Gospodareske, hem giljavenle ko tumare srcia! ²⁰Blagodarinen Leske sekogaš baši o sa e Devleske e Dadeske, ko anav amare Gospodareske e Isuse Hristoske! ²¹Pokorinen tumen jek jekeske ki dar taro Hristos!

Sar valjani te oven o roma hem o romnja

²²O romnja te pokorinenpes pe romenge, sar e Gospodareske, ²³soske o rom tano šero e romnakoro, sar soj tano hem o Hristos Šero e Crkvakoro hem Ov tano Spasiteli e Teloskoro! ²⁴Hem sar so i Crkva pokorinelapes e Hristoske, agjar te oven hem o romnja ko sa pokorna pumare romenge.

²⁵Romalen, mangen tumare romnen, sar so hem o Hristos zamanglja i Crkva hem predajngjape Korkori Pes baši lake, ²⁶za da te osvetinela, očistingjala pajneja thogjala ko slovo, ²⁷hem te pretstavinela anglo Peste i slavno Crkva, kola naela mahana, nitu brčka, ili nešto slično, za da te ovel sveto hem bizo fleka.

²⁸Agjar hem o roma tane dolžna te mangen ple romnen sar pumare tejlja. Koj mangela ple romnja, mangelape pes. ²⁹Soske nikoj nikogaš na zamrzingja plo telo. Nego, paravelale hem takjarelale sar hem o Hristos e Crkva. ³⁰Soske, amen sijem členia Oleskere Telostar – taro Oleskoro mas hem Oleskere kokala.

³¹‘Odoleske o manuš ka mukel pe dade hem pe daja hem ka prilepinelpe ki pli romni, hem o solduj ka oven jek telo.’ ³²Akaja tajna tani bari – a me vakjerava dikhibaja ko Hristos hem ki Crkva. ³³Hem agjar, sekoj tumendar te mangel pe romnja sar pes, a i romni te poštojnel ple rome.