Efesjajna 6
Sar valjani te oven i daj o dat hem o čhave
1Čhavalen, šunen tumare daja hem dade zbog baši o Gospodari, soske odovaj tano pravo. 2‘Poštojn te dade hem te daja’ – odovaj tani i prvo zapoved e vetuvajneja- 3‘za da te ovel tuke šukar hem za da te živine podugačko vreme ki phuv.’
4A tumen, dadalen, ma holjankjeren tumare čhaven, nego vospitinenlen sikajbaja hem opomenibaja taro Gospodari.
Sar valjani te oven o robia hem o gospodajra
5O tumen so sijen robia, šunen tumare gospodaren ki phuv soj tane, ki dar hem ko trepet, iskrena taro sa o srce sar e Hristoske! 6Ma služinen samo šukar anglo jajkha lengere, sar okola koj dikhena te ugodinen e manušenge, nego sar e Hristoskere služitejlja, koj sa tari duša izvršinena e Devleskiri vojlja! 7Služinen lenge šukar vojljaja sar e Gospodareske, a na e manušenge, 8džandipaja deka sekova robo ili slobodno manuš, ako kjerela nešto šukar, ka dobinel odova taro Gospodari!
9A tumen, gospodajra, ponašinen tumen isto agjar olencar, bizo te pretinenlen, džandipaja deka olengoro hem tumaro Gospodari tano ki nebesa! Hem deka Ov na dikhela koj tano koj!
Uraven tumen ko sa e Devleskoro oružje hem oprema
10Najposle, pojačinen tumen ko Gospodari hem ki sila tari Leskiri mokj! 11Uraven tumen ko sa e Devleskoro oružje hem oprema, za da te šaj te sprotivinen tumen ko hovavne bilačhe bukja e bengeskere. 12Soske amari borba nae tani protiv o rat hem o telo, nego protiv o načalstvia, protiv o vlastia, protiv o svetska vladetejlja e karanlukoskere ko akava veko: protiv o duhovna sile e bilačhipaskere ko nebesna thana.
13Odoleske len celo e Devleskoro oružje hem oprema, za da te šaj te braninen tumen ko bilačho dive, hem otkoga ka završinen sa, te tergjoven cvrsto! 14Hem agjar, tergjoven cvrsto, phanle e čačipaja preku ki polovina, hem uravde anglal ko kolin e oklopeja e pravdakoro, 15a ko pre uravde spremna baši o Evangelie e mireskoro! 16Ko sa akaleja, len o štiti e verakoro, koleja ka šaj te ačhaven sa o jagale strelke e bilačheskere. 17Lenle hem o šlemi e spasenieskoro hem o mači e Duhoskoro – koj tano e Devleskoro slovo, 18sekole rodibaja hem molitvaja, molinen tumen ko Duho ko sekova vreme, hem baši odova oven džangavde, den sa tumendar, izdržinen hem molitvaja baši sa o svetie. 19Hem baši mange, te delpes mange slovo koga ka phravav mo muj, za da te šaj te vakjerav bizo dar i tajna taro Evangelie, 20baši kova sijum prateniko ko phanlipa: za da te kjerav lafi bizo dar, sar so hem trebela te vakjerav.
Blagoslovia hem pozdravia
21A za da te džanen hem tumenda sa baši mange so kjerava buti hem sar sijum, baši o sa ka vakjerel tumenge o Tihik, o manglo phral hem verno sluga ko Gospodari; 22odova sebepi bičhavavale ki tumende, za da te džanen sar sijem amen hem za da te utešinel tumare srcia.
23Sa e phralenge odori mangava lenge mir hem mangipe veraja so avela taro Devel o Dat hem taro Gospodari o Isus Hristos.
24Hem neka ovel i blagodat sarinencar koj mangenale amare Gospodare e Isuse Hriste mangipaja so na ačhola!