Filipjajna 1

Pozdrav

¹O Pavle hem o Timotej, sluge e Hrista Isuseskere, dži ko sa o sveta ko Hristos Isus, koj tane ko Filipi, e nadzornikoncar hem e gjakonencar: ²blagodat tumenge hem mir taro Devel amaro Dat hem taro o Gospodari o Isus Hristos.

O Pavle blagodarinela ki sekoja molitva

³Blagodarinava me Devleske sekogaš koga spomninava man baši tumenge; ⁴sekogaš ki sekoja mli molitva molinava man baši sarinenge tumenge radosteja, ⁵baši tumaro učestvo ko propovediba o Evangelie taro prvo dive dži akana. ⁶Uverimo sijum ko odova, deka Okova, Koj počmingja o šukar delo ki tumende, ka dovršinele dži ko Dive e Hrista Isuseskoro.

⁷A hem pravo tano te mislinale odova baši sarinenge tumenge, soske sijen ko mlo srce sarine tumen, koj sijen součesnikja mancar ki blagodat – sar ko mlo phanlipe, agjar hem ki odbrana hem utvrduvanje o Evangelie. ⁸Soske o Devel tano mange svedoko kozom žedno sijum palo sarinende tumende ko oset hem mangipe taro o Isus Hristos.

⁹Hem odoleske molinava man tumaro mangipe te ovel izobilno sa poviše hem poviše ko pendžariba hem ki sekoja buti te razlikujnen, ¹⁰za da te šaj te ispitinen baši odova soj tano pošukar: te oven čista hem besprekorna ko Dive e Hristoskoro, ¹¹pherde e plodencar tari pravda, koj tane preku Isus Hristos, baši slava hem pofalba e Devle.

Ko bilo savo način o Hristos propovedinelape

¹²A mangava te džanen, phrajljalen, deka akava so ovela mancar pomožingja but poviše baši te širinelpes o Evangelie, ¹³agjar so ulo lenge jasno e celo carsko stražake hem sa e javerenge, deka sijum ko phanlipa baši o Hristos, ¹⁴hem deka povekje taro phrajlja ko Gospodari, ohrabrime taro mlo phanlipe, osmelinenapes sa poviše te propovedinen bizo dar e Devleskoro slovo.

¹⁵Čače, jek propovedinela e Hrista taro zavist hem mangipa ko prepirke, a javera tari šukar vojlja; ¹⁶jek taro mangipa, džandipaja deka pašljovava ko phanlipa baši odbrana o Evangelie, ¹⁷a javera navestinena e Hrista taro sebičnost, na čisto nameraja, mislinena te anen mange nevolja ko mlo phanlipe.

¹⁸Ama so togaš? Samo odova: deka ko sekova način, bilo dujmujale ili iskrena, o Hristos propovedinelape. Hem radujnava man baši odova, a hem ka radujna man, ¹⁹soske džanava deka akava – preku tumari molitva hem pomoš taro Duho e Isuse Hristoskoro, ka ovel mange baši spasenie, ²⁰soglasno mlo zoralo udžakjeriba hem nadež, deka ko ništo nae te ladžakjera man: ama sar hem sekogaš ki celo smelost, agjar hem akana, o Hristos ka vozveličinelpes ko mlo telo, bilo preku život, ili preku meribe.

Pritisnimo taro duj strane

²¹Soske baši mange život tano o Hristos, a o meriba – pridobivka. ²²Ama ako hem poadari živinava ko telo, odova baši mange značinela: plodno buti – hem na džanava so te birinav. ²³Pritisnimo sijum taro duj strane: isi man želba te džav mange hem te ovav e Hristoja, soj tano dur pošukar, ²⁴ama baši tumenge tano popotrebno te ačhovav ko telo.

²⁵Hem celosno uverimo ko odova, džanava deka ka ačhovav hem ka prodolžinav sarinencar tumencar, baši tumaro napreduvanje hem baši radost ki vera. ²⁶Hem tumari pofalba ko Hristos Isus, te ovel panda poizobilno ki mande, baši mlo povtorno ajbe maškar tumende.

Ponašinen tumen dostojno

²⁷Samo ponašinen tumen dostojno baši e Hristoskoro Evangelie, za da te šaj me – bilo te avav hem te dikhav, bilo te ovav otsutno te šunav baši tumenge, deka tergjona cvrsto ko jek duho, deka ednodušno borinena tumen zaedno baši i vera taro Evangelie, ²⁸hem deka ko ništo na darana taro protivnikja: odovaj tano olenge znako baši uništiba, a tumenge baši o spasenie, hem odova taro Devel, ²⁹soske tumenge dendoj milost baši o Hrista na samo te verujnen ki Leste, nego hem te ciden baši Leske, ³⁰te ovel tumen isto borba, sar so dikhlen ki mande, a hem akana šunena baši mange.