Filipjajna 2
Te oveltumen isto misle hem isto mangipe
1Hem agjar, ako isi nesavi uteha ko Hrista, ako isi nesavo ohrabruvanje taro mangipe, ako isi nesavi zaednica e Duhoskiri, ako isi nesavo andruno sočustvo hem somilost, 2ispolninen mlo radost, hem mislinen isto te ovel tumen isto mangipe, ednodušna ko misle vodime ko jek.
3Ma kjeren ništo taro te natprevarinen tumen ili taro suetno sebičnost, nego ko poniznost računinen tumen jek jekestar pobare taro tumendar! 4Ma dikhen sekoj samo pleske, nego sekoj neka dikhel ko okova so kjerelape lafi baši javerenge.
Te ovel tumen isto misla koja sine ko Isus Hristos
5Te ovel tumen ki tumende i isto misla, koja sine hem ko Isus Hristos; 6Koj iako tano e Devleske ko oblik, na računinela sine sar te grabinel odova soj tano jek e Devleja, 7nego ponizingjape Korkori Pes, hem lelja oblik taro sluga, ulo slično e manušencar. 8Hem otkoga araklisalilo ko liko sar manuš, Ov ponizingjape Korkori Pes hem ulo poslušno dži ko meribe, čak hem dži ko meribe ko krsto.
9Odoleske hem o Devel prevozvišingjale hem dengjale anav, soj tano upro sekova anav, 10hem e Isuseske ko anav te pokloninelpe sekoja kočak okolengiri: koj tane ko nebo, hem ki phuv, hem teli phuv; 11hem sekoja čhip te ispovedinel deka o Isus Hristos tano Gospodari, baši slava e Devleske o Dat.
O Devel tano Okova, Koj delujnela ki tumende
12Odoleske, mle mangljalen, sar so sekogaš sijen sine poslušna, na samo koga sijum uza tumende, nego panda poviše akana, koga na sijum uza tumende, kjeren buti ko tumaro spasenie daraja hem treperibaja. 13Soske o Devel tano Okova, Koj delujnela ki tumende te mangen hem te postapinen, spored Oleskiri vojlja.
14Kjeren sa bizo te žalinen tumen hem te na akošen tumen, 15za da te oven bizo mahana hem čista, neporočna Devleskere čhave, maškar iramo hem rumimo rodo, maškar koj ka svetinen sar svetilke ko sveto, 16ikjeribaja cvrsto o slovo e životoskoro, za da te ovel man soleja te falinav man e Hristoske ko Dive, deka na prastandiljum ko čučo hem deka na trudingjum man ko čučo.
17Ama, ako hem čhorgjovava sar prinos upri žrtva hem i služba tumare verakiri, radujnava man, hem radujnava man sarinencar tumencar. 18A isto agjar radujnen tumen tumenda hem radujnen tumen mancar.
O Pavle bičhavela e Timoteje
19Nadinava man ko Gospodari o Isus deka ka bičhavav tumenge skoro e Timoteje, ta hem meda te utešinav man koga ka sikljovav sar sijen tumen. 20Soske nae man nikoj, koj tano isto dušaja sar leste, koj doborom iskreno ka grižinelpes baši tumenge, 21soske sa o javera rodena plo, a na okova soj tano e Hrista Isuseskoro. 22Tumen džanena oleskiri dokažimi vernost, deka – sar čhavo e dadeskoro – mancar služinela sine ko širiba o Evangelie. 23Agjar, nadinava man deka ka bičhavavle ole, odma štom ka hajljovav so ka ovel mancar, 24a nadinava man ko Gospodari deka hem meda korkori skoro ka avav.
O Pavle palem bičhagja e Epafrodite
25Računingjum palem baši potrebno te bičhavav tumenge e Epafrodite, mlo phral hem sorabotniko hem zaedno borinaja amen – a tumaro prateniko, koj služinela baši mli potreba; 26soske sine but žedno palo sarinende tumende hem sine oleske pharo soske šungen deka sine nasvalo. 27Čače sine nasvalo paše dži ko meriba, no o Devel smilujsalilo, hem na samo leske, nego hem mange, za da ma te avel mange žal upri žal.
28Odoleske bičhagjumle poskoro, te radujnen tumen palem koga ka dikhenle, hem meda te ovav pohari sekirimo. 29Hem agjar, priminenle ko Gospodari sekole radosteja hem poštojnen asavken, 30soske baši e Hristoskoro delo araklisalilo paše dži ko meriba, čhigja po životo ko opasnost, za da te nadomestinel odova so tumen našti sine te uslužinen mange.