Filipjajna 3

I pravda taro Devel, upri osnova e verakiri

¹Hem agjar, mle phrajljalen, radujnen tumen ko Gospodari! Mange nae tano dosadno te pišinav tumenge isto, a tumenge ka služinel baši tumari bezbednost.

²Pazinen tumen taro džukjela, pazinen tumen taro bilačhe rabotnikja, pazinen tumen taro hovavno obrezanie! ³Soske, amen sijem o čačutno obrezanie; amen kola služinaja e Devleskere Duhoja hem falinaja amen ko Hristos Isus, a na nadinaja amen ko telo, ⁴iako hem meda šaj te doverinav man hem e teloske. Ako nekoj javer mislinela deka šaj te nadinelpes ko telo, odova me, panda poviše: ⁵obrezimo sijum ko ovtoto dive, taro izraelsko rodo sijum, taro e Venjamineskoro pleme, Evrein taro Evrea; sprema o Zakoni - farisej; ⁶sprema sa me silaja - goniteli e crkvakoro; sprema i pravda e Zakoneskiri sijum sine bizo te falinel nešto.

⁷Ama odova so sine mange nekogaš pridobivka, odova računingjum baši zaguba baši o Hristos. ⁸Ki suština, me hem akana računinava sa baši zaguba baši o prevažno pendžariba e Hrista Isuse, Mlo Gospodari, baši Kaste našagjum sa hem sa računinava baši otpad, za da te pridobinav e Hrista ⁹hem te arakhljagjovav ki Leste, na mle pravdaja, koja avela taro Zakoni; nego pali i pravda, koja avela preku i vera ko Hristos: i pravda taro Devel upri osnova e verakiri, ¹⁰za da te pendžarav Ole, hem i sila taro Oleskoro voskresenie, hem učestvo ko Oleskoro cidiba, te ovav slično sar Leste ko Leskoro meribe ¹¹ta nesar te doresav dži ko voskresenie taro mule.

Prastava ki cel baši nagrada

¹²Na vakjerava deka vekje doresljum ili deka vekje aljum dži ko sovršenstvo – nego nastojnava te doresav, soske hem manda o Hristos doreslja. ¹³Phrajljalen, me panda na mislinava deka doresljumle! ¹⁴Ama sepak kjerava jek: bistrava okova soj tano pali mande, a dikhava ko okova soj tano angli mande; prastava ki cel: baši nagrada ko upruno povik taro Devel ko Hristos Isus.

¹⁵Hem agjar, kola sijem sovršena mislinaja agjar; ako tumen mislinena hem nešto pojaver, o Devel ka otkrinel tumenge hem odovada. ¹⁶Ama palo okova, dži ko kova doreslem, spored o isto pravilo hem te ova ednomislena!

Amaro žitelstvo tano ki nebesa

¹⁷Ugledinen tumen ki mande, phrajljalen, hem dikhen okolende, koj džana agjar, sar so hem tumen isi tumen primer ki amende! ¹⁸Soske but džene, baši kaske so vakjerava sine tumenge but puti, a akana vakjerava hem asvencar, džana sar neprijatejlja baši o krsto e Hristoskoro. ¹⁹Lengoro krajo tano uništiba; olengoro devel tano o vogi; olengiri slava tani ki lengiri ladž; ola mislinena samo baši akaja phuv.

²⁰A amaro žitelstvo tano ki nebesa, kotar hem očekujnaja e Spasitele, o Gospodari o Isus Hristos, ²¹Koj ka preobrazinel amaro slabo hem smrtno telo, te sobrazinelpe oleskere slavno teloja, spored o delujbe tari Oleskiri sila, kolaja šaj te pokorinel sa teli Peste.