Pozdrav

¹O Jakov, sluga e Devleskoro hem e Gospodareskoro o Isus Hristos, dži ko dešuduj rasprsnime pleminja, pozdrav.

Blaženo tano o manuš, koj podnesinela iskušenie

²Računinenla baši čisto radost mle phrajljalen, koga ka peren ko razna iskušenia, ³džandipaja deka o ispituvanje tumare verakoro kjerela trpenie! ⁴A o trpenie neka ovele sovršeno delo, za da te oven sovršena hem potpolna, bizo ništo te na falinel tumenge.

⁵Ako nekastar tumendar falinela mudrost, neka rodel taro Devel, Koj dela sarinenge izobilno hem bizo ukor – hem ka delpes leske. ⁶Ama te rodel veraja, bizo nisavo somnenie; soske okova koj somninelape tano slično sar morsko brani kas so i bavlal vazdelale hem terinelale. ⁷Asavko manuš te na mislinel deka ka priminel nešto taro Gospodari. ⁸O manuš ulavde dušaja nae tano stabilno ko sa ple drumia.

⁹O bedno phral te falinelpes ko plo baripe, ¹⁰a o barvalo ki pli poniznost, soske ka nakhel sar i luludi e čajratar. ¹¹Soske o kham iklilo bare tatipaja hem šukjargja i čar, pa lakiri luludi prepeli hem našavdilo o šužipa taro olakoro izgled. Agjar hem o barvalo ka šukjol ko ple drumia.

¹²Blaženo tano o manuš, koj podnesinela iskušenie, soske koga ka ovel ispitimo, ka priminel venco e životoskoro, so o Devel vetingjale okolenge, koj mangenale.

Sekova šukar dari taro Develi tano

¹³Nijek, koj tano iskušimo te na vakjerel: „O Devel iskušinela man.“ Soske, o Devel na iskušinelape taro bilačhipe, hem Korkori nikas na iskušinela. ¹⁴Nego, sekas iskušinela oleskiri sopstveno pohota, koja vlečinelale hem hovavelale. ¹⁵Palo odova i pohota začninela hem bijanela grevo, a o kjerdo grevo bijanela meriba.

¹⁶Ma zabludinen tumen, mangljalen mle phrajljalen. ¹⁷Sekova šukar dari hem sekova sovršeno bakšiši avela upraldan, taro Dat e svetlinakoro, ki Kaste nane izmene, nitu senka tari promena. ¹⁸Ov bijangja amen spored Pli vojlja preku o Slovo e čačipaskoro, za da te ova sar jek vrsta prva plodia maškar Oleskere sozdania.

Šunen hem ikjeren o Slovo

¹⁹Džanen akava, mangle phrajljalen: sekova manuš te ovel brzo ko šuniba, a bavno ko lafikjeriba, hem bavno ki holi, ²⁰soske e manušeskiri holi na kjerela pravda anglo Devel. ²¹Odoleske frden tumendar: sekova melalipa, hem o posledno okova so ačhilo e bilačhipaskoro, hem priminenle e krotkipaja ki tumende o nasadimo Slovo, kova šaj te spasinel tumare duše.

²²Ama oven okola so ikjerena o Slovo, na samo so šunena, koj hovavenape pes. ²³Soske, koj šunela o Slovo, a na ikjerelale, sličnoj tano ko manuš, koj dikhela plo prirodno muj ki ajna; ²⁴ka dikhelpes hem ka džal peske, hem odma bistrela savo sine. ²⁵A koj ka zadikhelpes ko sovršeno zakoni e slobodakoro hem ačhola ki leste, na sar bisterdo slušateli, nego sar čačikano okova so ikjerela, ov ka ovel blaženo ko odova so kjerela.

²⁶Ako nekoj mislinela deka tano devlikano, a na kontrolirinela pli čhip, nego hovavela plo srce, oleskoro devlipa tano suetno. ²⁷Akavaj tano čisto hem bivalkajmo devlipa anglo Devel hem o Dat: te oven posetime o čorole čhave hem o udovice ko olengere nevolje, hem korkori te pazinelpes pes neporočno taro sveto.