Jakov 2
Ma dikhen koj tano koj
1Mle phrajljalen, neka ovel tumen vera ko amaro slavno Gospodari o Isus Hristos, te na dikhen koj tano koj! 2Soske ako ko tumaro sobranie kaj so khedena tumen alo manuš zlatno angrustikaja hem parne čista šuže šejencar, a khuvela hem čorolo melale šejencar, 3pa dikhena ko okova, soj tano ko parne čista šuže šeja, hem vakjerena leske: „Tu beš akate šukar!“ a e čoroleske vakjerena: „Tu tergjov athe!“ ili „Beš telo me pre,“ 4na kjerena li razlika maškar tumende hem agjar ulen sudie bilačhe mislencar?
5Šunen, mle mangle phrajljalen, na izbiringja li o Devel okolen, koj tane čorole ko akava sveto, za da te oven barvale ki vera hem naslednikja baši o Carstvo, kova obečingja lenge okolenge, koj mangenale? 6A tumen uvredžingen e čorole! Nae li o barvale odola, koj maltretirinena tumen hem vlečinena tumen ko sudie? 7Nae li tane o barvale odola koj džana protiv bilačhe lafencar so vakjerena, baši o šukar Anav palo kova hem tumenda vikinena tumen?
8Ako pak ispolninenale o carsko zakoni sprema o Sveto Pismo: ‘Mang tle pašutne sar korkori tut!’ – šukar kjerena. 9Ama ako sprema jek manuša, ponašinena tumen šukar, a sprema o javera bilačhe, kjerena grevo hem sprema o Sveto Pismo tumen sijen odola so phagena o zakoni.
10Soske koj pazinela celo zakoni, a sopninelape samo ko jek, ovela krivo baši o sa. 11Soske Okova Koj vakjergja: ‘Ma kjer preljuba!’ vakjergja hem: ‘Ma mudar!’ Ako na kjereja preljuba, a mudareja, oveja sar okova so phagela o zakoni.
12Kjeren lafi hem postapinen sar manuša, so ka oven osudime palo o zakoni kova oslobodinela amen. 13Soske o sudo naele milost sprema ko okova, koj na sikagja milost. I milost slavinela pobeda upro sudo.
I vera hem o dejlja
14Savo korist tano, mle phrajljalen, ako nekoj vakjerela deka isile vera, a naele dejlja? Šaj li i vera te spasinele? 15Ako nesavo phral ili phen tane nange hem bizo te ovelen hajbaske sekova dive, 16pa nekoj tumendar vakjerela lenge: „Džan tumenge ko mir, takjoven hem čajljoven!“ a na delalen odova, soj tano olenge potrebno baši telo, savo korist tano? 17Agjar hem i vera: ako naela dejlja, muli tani korkori ki peste.
18Ama ako nekoj vakjerela: tut isi tut vera, a man isi man dejlja. Sikav mange tli vera bizo dejlja, a me ka sikavav tuke i vera taro mle dejlja. 19Tu verujneja deka isi samo jek Devel. Šukar kjereja; hem o demojna verujnena hem tresinena.
20Mangeja li palem te džane, bigogjakere manušeja, deka i vera bizo dejlja tani muli? 21Amaro dat o Avraam na sine li opravdimo taro dejlja, koga dengja ko žrtveniko ple čhave e Isako? 22Dikheja deka i vera kjergja buti oleskere deloncar, hem deka i vera preku dejlja reslja dži ko sovršenstvo. 23Hem agjar ispolningjapes o Sveto Pismo, koj vakjerela: ‘O Avraam poverujngja ko Devel, hem odova računisalilo leske baši pravda,’ hem vakjersalilo Devleskoro amal. 24Dikhena deka o manuš opravdinelape preku dejlja, a na samo preku i vera. 25Isto agjar hem i bludnica Raav na opravdingjapes li preku dejlja, koga primingja e izraelsko poslanikon hem koga bičhagjalen palo javer drumo? 26Ustvari, sar soj tano o telo bizo duho mulo, agjar hem i vera bizo dejlja tani muli.