Pozdrav

¹O Pavle, o apostoli e Isuse Hristoskoro preku e Devleskiri vojlja hem o phral o Timotej, ²dži ko sveta hem verna phrajlja ko Hrista, ko Kolos: i blagodat tumenge hem o mir taro Devel amaro Dat.

Na ačhovaja te molina amen baši tumenge

³Blagodarinaja e Devleske, hem Dat amare Gospodareske o Isus Hristos, molinaja amen sekogaš baši tumenge, ⁴soske šungem baši tumari vera ko Hristos Isus hem baši o mangipa, kova isi tumen ko sa o svetie. ⁵Baši o nadež, koja arakhelape baši tumenge ki nebesa, baši koja šungen porano taro čačikano slovo taro Evangelie, ⁶kova alo ki tumende, sar hem ko celo sveto, hem plodno bajrola sar hem ki tumende, taro odova dive koga šungen hem zapoznajngen e Devleskiri blagodat ko čačipe, ⁷sar so siklilen taro Epafras, amaro manglo sorabotniko ki služba, koj tano verno e Hristoskoro služiteli baši tumenge, ⁸koj izvestingja amen baši tumaro mangipe ko Duho.

⁹Odoleske hem amen taro odova dive koga šungem odova, na ačhovaja te molina amen baši tumenge hem te roda te ispolninen tumen pendžaribaja tari Oleskiri vojlja ki sekoja mudrost hem duhovno te hajljoven, ¹⁰agjar so te džan dostojno baši o Gospodari hem te oven Oleske ugodna ko sa; za da te oven plodna ko sekova šukar delo hem za da te bajron ko pendžariba e Devle; ¹¹te zajakninen ki sekoja sila, spored e silaja Oleskere slavakiri, baši sekoja nepokoleblivost hem trpenie; radosteja ¹²te blagodarinen e Devleske, Koj osposobingja amen baši učestvo ko nasledstvo e svetienge ki svetlina.

¹³Ov izbavingja amen tari vlast e temnicakiri hem preselingja amen ko Carstvo Ple mangle Čhaveskoro, ¹⁴ki Kaste isi amen otkup, preku Leskoro rat, oprostuvanje e grevonge.

Saj tano sozdajmo preku Leste hem baši Leske

¹⁵Ovi tano obraz taro nevidlivo Devel, Prvobijando taro sekova sozdanie, ¹⁶soske ki Leste tano sozdajmo sa soj tano ki nebesa hem ki phuv, vidlivo hem nevidlivo, bilo prestojlja, ili gospodarstva, ili načalstvia, ili vlastia, saj tano sozdajmo preku Leste hem baši Leske.

¹⁷Hem Ovi tano angleder o sa hem saj ki Leste phanlo. ¹⁸Ovi tano hem Šero e Teloskoro, e Crkvakoro. Ovi tano početok, Prvobijando taro mule, za da te ovel Prvo ko sa, ¹⁹soske e Dadeske sine ugodno ki Leste te vselinelpe celosno polnota, ²⁰hem preku Leste te pomirinel ki Peste sa soj tano ki phuv ili ko nebo, te kjerel mir preku o rat Oleske ko krsto.

²¹Hem tumen, koj sijen sine nekogaš jabandžie hem neprijatejlja ko tumaro mislenje hem bilačhe dejlja, ²²akana pomiringja tumen preku o meriba ko Oleskoro manušikano telo, za da te ikavel tumen angli Peste: sveta, neporočna hem bizo te oven kriva, ²³samo ako ačhovena ki vera zaosnovime hem cvrsta hem nepokolebliva ki nadež taro Evangelie, kova šungenle, kovaj tano propovedimo baši celo sozdanie telo nebo hem ko kova me, o Pavle, uljum leske služiteli.

I tajna koja sine garavdi

²⁴Akana radujnava man ko mlo cidiba baši tumenge – hem ko mlo telo dopherava odova so nedostasinela e Hristoskere mukenge, baši Oleskoro telo, kovaj tani i Crkva, ²⁵ki koja me hem uljum služiteli, spored e Devleskoro upravitelstvo; soj mange tano dendo baši tumenge, za da te ispolninav e Devleskoro slovo; ²⁶i tajna, koja sine garavdi vekoncar hem pokolenia, a koja tani otkrimi akana Oleskere svetienge, ²⁷ki Kaste o Devel manglja te javinel sar tani barvali i slava akale tajnakiri maškar o narodia: o Hristos ki tumende, nadež e slavake.

²⁸Amen propovedinaja Ole, opomenibaja sekole manuše hem sikavaja sekole manuše ki celo mudrost, za da te pretstavinale sekole manuše sovršeno ko Hristos Isus. ²⁹Odoleske trudinava man hem borinava man spored Oleskere delotvorno silaja, koja delujnela silno ki mande.